Rusia e pranon sulmin në Çapline: Kemi vrarë 200 ushtarë! Kievi: Janë vrarë 25 civil!

Ministria ruse e Mbrojtjes e ka pranuar sot se forcat ruse kanë goditur stacionin e trenit në Çapline në rajonin ukrainas Dnipropetrovsk, duke shtuar se me këtë rast ka vrarë “200 ushtarë”, ndërsa Kievi thotë se janë vrarë të paktën 25 civilë, raportojnë agjencitë.

Moska bënë të ditur se të mërkurën ka vrarë “200 ushtarë ukrainas” në sulmin mbi stacionin e trenit në Çapline, raporton Agjencia e lajmeve France presse. 

“Raketa Iskander ka goditur trenin ushtarak në stacionin e trenit në Çapline në rajonin Dnipropetrovsk duke vrarë 200 ushtarë të formacionit rezerv të Forcave të Armatosura të Ukrainës,” thuhet në komunikatën e Ministrisë së Mbrojtjes, duke shtuar se ka shkatërruar dhe pajisjet ushtarake.

Por Kievi nga ana e tij ka bërë të ditur se me rastin e sulmit rus janë vrarë 25 civilë, duke shtuar se në shënjestër ishte një bllok i banesave me civilë. Ndërkohë Rusia edhe sot mohon se gjuan civil.

Në konferencën e përditshme për media, Ministria ruse e Mbrojtjes tha se raketa Iskander ka goditur trenin ushtarak i cili po dërgonte armë për frontin e Donbasit. Zv/shefi i Zyrës së Presidentit, Kirilo Timoshenko, thotë se në mesin e të vrarëve janë dhe dy fëmijë ndërsa janë plagosur 31 persona.  

Informacionet nuk janë konfirmuar nga burime të pavarura meqë deri te informacionet e besueshme nga lufta në Ukrainë vazhdon të ketë vështirësi.