Samiti BE-Ballkani Perëndimor, 6 dhjetori ditë pushimi në Tiranë

Dita e martë, 6 dhjetori, kur do të mbahet Samiti BE-Ballkani Perëndimor, do të jetë ditë pushimi në Tiranë. Ky vendim i Qeverisë për administratën dhe shkollat është marrë për shkak të masave të sigurisë kur kryeqytetin shqiptar pritet ta vizitojnë të gjithë liderët europianë.

Ndërkohë disa nga akset kryesore do të bllokohen duke përfshirë këtu unazën për kalimin e makinave, ndërsa në pika të ndryshme do të ketë kontrolle nga forcat e sigurisë. Me mbërritjen e liderëve evropianë në Tiranë, përveç personave të akredituar do të jetë e pamundur të kalohet perimetri i sigurisë që nis nga Kryeministria në drejtim të Pallatit të Kongreseve dhe përreth stadiumit “Air Albania”.

Kështu, pritja e liderëve europianë do të bëhet tek Sheshi Italia rreth orës 10 të mëngjesit të 6 dhjetorit dhe më pas ata do të drejtohen drejt hotelit Marriott tek Stadiumi Air Albania, ku do të zhvillohet dhe Samiti.

Mbledhja do të vijojë deri në orën 13:00 dhe pas drekës, rreth orës 15:00 pritet të mbahet konferenca e përbashkët mes kryeministrit Edi Rama, Presidentes së KE, Ursula Von der Leyen dhe Presidentit të Këshillit Europian, Charles Michele.

Ndryshe, për të garantuar mbarëvajtjen e Samitit do të angazhohen mbi 1200 efektivë policie, që do të shoqërojnë dhe delegacionet nga Aeroporti Ndërkombëtar “Nënë Tereza” deri në qendër të Tiranës. Për çështjen e sigurisë, prej disa ditësh në Tiranë po qëndrojnë ekipet e Brukselit që po koordinojnë punën me ekipet shqiptare dhe trajnimin e Policisë së Shtetit.