Samiti i NATO-s historik, Berisha: Por, Shqipëria u përfaqësua në mënyrë qesharake nga padrinoja

Kryetari i Partisë Demokratike, Sali Berisha edhe sot vlerësoi Samitin e NATO-s në Ankara si një nga samitet më të suksesshme në historinë e Aleancës, por në bashkëbisedim me qytetarët përmes rrjeteve socialie tha se Shqipëria u përfaqësua në mënyrë qesharake nga padrinoja.

“Samiti i Ankarasë i NATO-s, në vlerësimin tim, është një nga samitet më të suksesshme në historinë e aleancës.
Dhe ishte një samit vërtet historik për arritjet transformuese për aleancën e Atlantikut të Veriut.
I vetmi vend që u përfaqësua aty në mënyrën më qesharake, më të padenjë, ishte Shqipëria sepse padrinoja i Shqipërisë, me ekzibicionizmin e tij të papërmbajtur, mendoi se në samitin më serioz të planetit mund të shkohet me atletet e basketbollistit.
Nuk kam asgjë për atletet, por ato janë për evente sportive, kurse në atë samit vetëm ai që nuk ka mend, vetëm ai që është torollak, vetëm ai që është i sëmurë dhe nuk kontrollon ekzibicionizmin e tij mund të bëjë këtë akt.
Ai personalisht mori atë që meritonte, e damkosën si shakaxhi, si hokatar dhe servil mediat më të mëdha të botës.
Por Shqipërinë, nuk mund të them se nuk i mbeti turpi nga përfaqësimi nga një individ si ky, i cili sikundër fyen Kushtetutën e vendit të tij, shkel rregullat e hekurta të protokolleve ndërkombëtare, duke harruar se ato janë rregulla për të demonstruar respektin, për të demonstruar seriozitetin për ata që ti përfaqëson dhe ndaj atyre që ti takon.
Ato nuk janë vullnetarizma. Ato janë shekullore.
Por kur hyn ai që nuk meriton, nuk po e prish gojën, aty ku nuk duhet pastaj priten gjëra të tilla.
Sidoqoftë e rëndësishme është protesta, revolta paqësore e fuqishme e qytetarëve që qëndron e pamposhtur dhe e jashtëzakonshme.
Sot, ftoj të gjithë qytetarët të bashkohen në një protestë të fuqishme, tërësisht ndaj akteve të përsëritura të Edi Ramës dhe qeverisë së tij.
Por e vërteta është se pagesa 4 milionë për Kanye West është një fyerje, është një injorim i tmerrshëm për shqiptarët dhe ata qindra mijëra qytetarë që janë në protestë kundër tij,” tha Sali Berisha ku eshe sot u zotua se për “Albanian Files” PD do kërkon hetim ndërkombëtar për transaksionet e këtyre studiove ku, sipas tij, Edi Rama ka përqindjen e tij në çdo projekt.

“Blerje ndikimi, mbështetje dhe lidhje ndërkombëtare, është një nga qëllimet e atyre projekteve. Natyrisht, duhet ta kemi të qartë, në çdo projekt Edi Rama ka përqindjen e tij shumë të lartë. Në çdo projekt.
Por krahas kësaj, siç e shihni ju, ai nëpërmjet atyre studiove ka blerë influencë kolosale politike.
Ndaj edhe ne po kërkojmë- ne kemi respekt për çdo arkitekt, urbanist, studio e të tjerë- por në këtë rast ne do kërkojmë hetim ndërkombëtar për transaksionet e këtyre studiove me projektet e Librit të Kuq.
Ato transaksione arrijnë në 1.5, 2 miliardë euro. Si janë paguar? Me cilat banka, me cilat strajca, me cilat fasha,” sqaroi Kryetari i Partisë Demokratike ndërsa iu përgjigj dhe interesit për zhvillimet në PD, zgjedhjes së Nënkryetarëve dhe Sekretarit të Përgjithshëm, ndërsa në fund të gjithë atyre demokratëve që me padurim presin vizitën e Sali Berishës në Shtetet e Bashkuara, u shprehë:

“Unë do vij në Amerikë, mendoj në ndonjë rast, shpresoj nga vjeshta, po të ketë ndonjë aktivitet ndërkombëtar ose kombëtar domethënë, do vij me kënaqësi të madhe.”