Seancë plenare, Kryeministri Kurti publikon emrat e sulmuesve të KFOR-it, lidhjet me Vuçiçin
Kosova dëshiron demokratizim të Serbisë, por nuk mund të paguajë çmim si shtet e territor për këtë, tha sot Kryeministri Albin Kurti në seancën plenare të Parlamentit të Kosovës ku po debatohet për situatën veri ndërsa serbët po protestojnë në ditën e tyre të gjashtë pas vendosjes së kryetarëve të zgjedhur në komunat në veri, Zveçan, Zubin Potok dhe Leposaviç, ndërsa identifikoi si organizator kryesor të proteuseve, pjesëtarët e “Mbrojtja Civile” dhe ish pjesëtarët e Policisë së Kosovës.
Në fillim, Kryeministri Albin Kurti tha se janë serbët ata që kanë braktisur institucionet, përfshirë edhe postet e deputetëve, vetëm se vijnë çdo gjashtë muaj të nënshkruhen sa për të marrë pagën.
Kurti sqaroi se ndërtesat e komunave nuk janë marrë me forcë sepse ato janë pronë e shtetit dhe policia nuk merr ndërtesat e veta. Ndërtesat e komunave kanë qenë të zbrazëta ndërsa prezenca e policisë ka qenë e justifikuar sepse aty është dashur të hyjë kryetari i komunës.
Kurti tha se të hënën, një pjesë e mirë e bandave kriminale, u kthyen nga tubimi në Serbi, u kthyen për ta përshkallëzuar situatën.
“Ka video e foto që dëshmojnë për krijimin e dhunës dhe autor është Beogradi zyrtar”, tha kryeministri Kurti duke shtuar se pas deklaratave mbështetëse dhe mbajtjen e zgjedhjeve, duhej të mbështeteshin kryetarët e rinj.
“Kjo është deklarata e munguar dhe e shoqëruar me shqetësime të tepruara, nuk i ka ndihmuar situatës,” tha Kurti i bindur se Kosova ka vepruar në përputhje me Kushtetutën.
“Nuk ka pasur asnjë befasi dhe duhet ta përsëris se pasuria e Republikës është e qytetarëve. Nuk mund t’i mbyll sytë kur grupe kriminale e fashiste minojnë rendin e republikës,” u shpreh kreu i Qeverisë së Kosovës, duke rikujtuar se fatkeqësisht shumë qytetarë janë të detyruar të dalin në protesta.
“Kategoria e parë janë personat e së ashtuquajtur Mbrojtja Civile që e admirojnë Millosheviqin e Putinin, kategoria e dytë janë punëtorët e administratës publike që po nuk dolën, humbin pagat, kurse treta janë punëtorët e radojçiqave e veselinoviçave që i kushtëzojnë me vendet e punës.”
Kurti tha se këto janë protesta që vijnë nga lart, pra jo vullnet i popullit, por presion i Vuçiçit.
“Më vjen keq për qytetarët serbë sepse ata janë qytetarët më të pa lirë, për shkak të Beogradit. Ata duhet të çlirohen nga milicia fashiste,” Kryeministri i Kosovës duk ekonstatuar nga folorja e parlamnetit se Kosova sot nuk është demokratike në veri sepse Beogradi nuk dëshiron të ketë parti të tjera.
Me këtë rast Kurti publikoi dhe emrat e agresorëve ndaj forcave të KFOR-it.
“Milorad Jevtiç është njëri nga drejtuesit e këtij formacioni ilegal, shtëpia e të cilit në Zveçan, është shndërruar në bazë të qëndrimit të drejtuesve të kësaj strukture ilegale,” tha Kryeministri Kurti duke shtuar se në këtë shtëpi ka dhe prezencë të madhe të përfaqësuesve politikë të Listës Srpska.
“Ata janë duke punuar në mobilizimin e strukturave atje, për prezencë sa më të madhe para objekteve komunale dhe duke orkestruar sulmet e ardhshme.
Miçko Jevtiç, pjesëtar i formacionit ilegal të ashtuquajtur ‘Mbrojtja Civile’ në Zveçan. E bashkë me të, Rajko Jevtiç, ish-këshilltar i Listës Srpska në Zveçan dhe ish-drejtor në komunën e Zveçanit, babai i Miçko Jevtiç,” tha Kryeministri Kurti duke shtuar.
“Danilo Josifoviç, i njohur me nofkën ‘Përki’, gjithashtu pjesëtar i formacionit ilegal të ashtuquajtur ‘Mbrojtja Civile’. Liljana Aksintijeviç, zëvendësuese e kryetarit të së ashtuquajtur Organ i Përkohshëm në Zveçan, ka urdhëruar të gjithë punëtorët e komunës ilegale të Zveçanit që në orën 6:30 të dalin para komunës,” vazhdoi kryeministri Kurti duke pubikuar të dhëna mbi organizatorët dhe urdhërdhënësit e protestës në veri.
Për personat që po shihen të maskuar në protestë, në video dhe fotografi, tha ai, janë të udhëhequr nga ish-kapiteni i Policisë së Kosovës, Aleksandar Filipoviq.
“Ky shtirej se është integruar në shtetin tonë. Ky është personi kryesor që po i drejton ata.”
Kryeministri i Kosovës tha nga foltorja e parlamentit se se ky person, me 29 maj të këtij viti, ka rrahur një qytetar serb në Leposaviç, pasi ai ishte duke xhiruar me telefon ndërsa publikoi emrat e atyre që janë të maskuar në protesta në veri.
“Ata janë: Nikolla Axhiç, ka hedhur koktej molotovi në Zveçan dhe është pjesëtar i organizatës kriminale serbe, ‘Severna brigada’,” tha Kryeministri për të vazhduar me emrat e tjerë.
“Millan Zhivkoviç, gjithashtu pjesëtar i së njëjtës organizatë. Danilo Krivokapiç, Jovica Llazoviç, Nikolla Radomiroviç, vëllezërit Stefan dhe Dejan Nedelkoviç,” tha Kryeministri Kurti para deputetëve.
Kjo organizatë kriminale, tha ai, në rrjetet sociale, ka postuar lajm që pjesëtarët e grupit mercenar rus, Wagner, kanë arritur në Kosovë. Ai tha se i njohur për lidhjet e tij me këtë grup paramilitar rus është edhe Damjan Knezheviç.
“Ky e drejton organizatën djathtiste ‘Narodna Patrole’,” tha Kurti duke shtuar se edhe ky person ka paralajmëruar ardhjen e një grupi prej 50 personash nga Serbia në Kosovë.
“Damjan Knezheviç dhe organizata e tij, organizuan protestën e 18 dhjetorit të vitit të kaluar në afërsi të pikës kufitare në Jarinje, me ç’rast u patën identifikuar një numër i konsiderueshëm personash me simbole ekstremiste ruso-serbe.”
Kryeministri më tej publikoi emrat e personave të tjerë të përfshirë në sulmin e tyre ndaj KFOR-it e ku u lënduan 30 pjesëtarë të këtyre trupave. Duke shfajësuar qytetarët serbë, Kurti tha se është mirë që si vendorët dhe ndërkombëtarët ta dinë se ushtarët e NATO-s janë sulmuar nga, siç tha ai, milicia fashiste.
“Ata janë: Vladimir Radivojeviç, i cili ka njohje të drejtpërdrejtë me presidentin e Serbisë, Aleksandar Vuçiç. Danijel Gjukiç, bashkë me një grup personash kanë hedhur shok bomba. Këta janë pjesë e grupit të Milan Radojçiçit të njohur për ndikim dhe veprimtari kriminale. Milosh Gjukiç, vëllai i Danijelit, dhe këta dy vëllezër kanë raporte shoqërore me djalin e presidentit të Serbisë, Vuçiç,” tha kryeministri Kurti duke shtuar:
“Milan Jugoslav Tomiç, i lindur në Obiliq e me banim në komunën veriore të Mitrovicës, ka marrë pjesë në shpimin e gomave të automjeteve të Policisë së Kosovës.
Milan Joviç, pjesëtar i formacionit ilegal të ashtuquajtur ‘Mbrojtja Civile’ me 31 mars, bashkë me një grup ka shkuar për trajnim në Rashkë të Serbisë, për përdorimin e armës. Të tjerët janë Petar Milosheviç, Dejan Jevtiç, Nikola Baldini, Milan Zhivkoviç, Vuk Brankoviç, Luka Vlaskoviç, Bozhidar Todoroviç dhe Radisha Denoviç”.
Kurti foli dhe për fotografinë që mori vëmendjen e rrjeteve sociale, të Danijel Simiçit.
“Ky ka qenë edhe mbase tani është vozitës dhe truproje i nënkryetarit të Listës Srpsa, Igor Simiç. Danijel Simiç ka ushtruar sulmin mbi ushtarët e KFOR-it”.
Përveç pjesëtarëve të grupit ekstremist “Severna Brigada”, tha ai, prezent ka qenë edhe grupi i tifozëve “Delije” i klubit të futbollit “Crvena Zvezda”.
“Këta kanë qenë të përgatitur për sulm ndaj KFOR-it,” tha Kryeministri duke shtuar se ka dëshmi dhe evidencë të panumërt materiale për këtë gjë.
Pas përshkallëzimit të situatës dhe lëndimit të dhjetëra ushtarëve të KFOR-it, ai tha se është arrestuar Nebojsha Elezoviç.
“Ky e ka shoqëruar Goran Rakiçin në Beograd me datën 23 mars 2022, për të marrë pjesë në mbledhjen e Këshillit të Sigurisë së Serbisë”.
I arrestuar tjetër është Radosh Mitroviç dhe Zhivojko Milentijeviç. Me 31 maj në orët e hershme të mëngjesit, Policia e Kosovës ka arrestuar dy shtetas serbë:
“Ivan Sekuliç dhe Sinisha Jevtiç. Ata kanë poseduar materiale të dyshimta përfshirë maska kamuflazhi, emblema me simbole nacionaliste, kartela të veteranëve të luftës, kartelë të Akademisë për Siguri të Serbisë, shufër metalike, disa thika, substanca narkotike, sprej të ndryshëm sfera metalike dhe një çekan”.
Në këtë rast, tha Kurti, kemi të bëjmë me milici fashiste ndërsa përfundoi:
“E për këtë përballje, Policisë së Kosovë si duhet Qeveria e Kosovës të cilën e ka. E Qeverisë së Kosovës i duhet Kuvendi i Republikës, ju tregoni a e ka.
Policisë së Kosovës i nevojitet populli i Kosovës, të cilin e ka. Pra është në dorën tonë kjo fitore e radhës për sundim të ligjit dhe kushtetutshmërisë.”
