Sekretari amerikan i Shtetit në Tiranë, kthim apo kompensim të SPAK-ut?!

Në prag të vizitës së Sekretarit amerikan të Shtetit, Antony Blinken, axhenda e tij u bë tërkuzë dhe në masën më të madhe, kontribut në këtë absurditet, deshi apo jo Alex Soros, e ka Kryeministri i Shkodrës, Himarës dhe gjithë Shqipërisë, Edi Rama!

A do ta takoj Sekretari amerikan i Shtetit, Antony Blinken, kreun e SPAK, Altin Dumani?!

Kjo nuk është pyetje ndonëse u shtrua me sforcim shumë të madh nga mediat në shërbim të Edi Ramës, e nëse kreu i DASH vjen në Tiranë për ta takuar kreun e kësaj strukture që Kryeministri thotë se e krijoi Partia Socialiste, sapo Ambasadorja e SHBA, Yuri Kim, i hipi avionit drejt Washingtonit, mirë është ta sqarojë pronësinë e kësaj Prokurorie të Posaçme, më shumë për ti kthyer autoritetin se sa pronësinë!

Dhe, mundësisht, Sekretari Blinken është mirë të shmang burokracinë e Agjensisë për kthimin dhe kompensimin e pronave, por, ta thotë troç edhe nëse nuk e takon Altin Dumanin, ndryshe çështja do të komplikohet paksa!

Nëse i pari i DASH thotë se SPAK është pronë amerikane, jo që e bënë Arben Krajën më pak ose më shumë amerikan sepse ai është stalinist, por, së pari i mbyllë gojën shefit të këtij prokurori, Edi Ramës, që të mos vazhdojë të zhvlerësoj këtë strukturë të posaçme duke thënë se e krijoi Partia Socialiste, ndërsa, sa për llumin komunist Arben Kraja, ai është i kalitur me Sigurimin dhe e njehë gjuhën e drunjtë!

Në këtë rast, do t’i bëjë një shërbim edhe qytetarëve shqiptarë të cilët e morën të mirëqenë hipotekën që e bëri publike Edi Rama, duke njohur prejardhjen dhe partinë kriminale që drejton, e që pronën e kanë zët! Dhe, do ti rikthej imazhin SPAK-ut që mund të ndërlidhet me pavarësinë sikur ajo të jetë edhe imagjinare me një central diku në Amerikë!  

Nëse i pari i DASH heshtë duke e pranuar se SPAK është krijuar nga Partia Socialiste ashtu siç është shprehur Edi Rama nga strukturat më të larta të PS, edhe në këtë rast shqiptarët do të vazhdojnë të qëndrojnë të qetë ashtu siç ishin para Reformës në Drejtësi që filloi nga Rama dhe Xhafa, dhe do fusin dorën në xhep për të parë nëse kanë shans ta fitojnë gjyqin e radhës apo prona e tij apo fisheku i shkrepur do t’ju bjerë kokës!

Dhe, ndonëse nuk është Jul Cesari dhe nuk është nisur drejt Sirisë, Antony Blinken nuk ka se pse thotë “Veni, Vidi, Vici” sepse këtu askush nuk e konteston që është tokë amerikane, por, opozita pavarësisht artikulimit politik që dëgjohet me raste nuk është e dëshpëruar nga propaganda e Edi Ramës por pret një Sekretar amerikan të Shtetit ndryshe, duke pasur parasysh vitin zgjedhor dhe faktin se të dy partitë e mëdha nuk mbështesin kandidatin për President Donald Trump as në takime private!

Ndërkohë për të gjithë ata që bëjnë fantashkencë dhe e përkthejnë vizitën e Sekretarit amerikan të Shtetit në Tiranë për takim me Kryeministrin Edi Rama për shkak të zhvillimeve në Kosovë, kjo është aq pa lidhje sa dhe fantashkenca që bëhet me çështjen McGonigal!

Pushteti që gëzon Blinken në Tiranë është po aq i madh sa në Prishtinë dhe si marrëdhëniet tradicionale ashtu dhe Rama nuk zënë vend këtu asgjëkundi përderisa vazhdon dhe merr frymë Alexi. Në fund, ata që e ndërlidhin vizitën e Blinken me çështjen McGonigal, nuk duhet të jenë aq idiotë sa komunistët e Edi Ramës që shohin ëndrra me sy hapur dhe mendojnë se realisht do hetohet një ditë Gërdeci! E vërteta e Gërdecit do ngelet në Pentagon, ashtu si dhe vërteta e McGonigal që do ngelet në FBI, të tjerat janë dokrra hiri!

Në fund, një gjë është e sigurt, me përfundimin e vizitës në Tiranë, Sekretari amerikan i Shtetit, Antony Blinken, do të udhëtoj drejt Munichut aty ku prezenca e tij në Konferencën e Sigurisë është e domosdoshme dhe priten përgjigje në sfida si Ukraina, emigracioni, sulmet kibernetike dhe pasojat e IA, të cilat kanë filluar dhe po ndryshojnë botën.