Sekuestrohet sasi rekord në Evropë, Itali: 4.3 ton kokainë me vlerë 240 mln euro

Megaoperacioni i Antimafias italiane, falë bashkëpunimit të Guardia di Finanza dhe SHBA, u finalizua në Trieste me sekuestrimin më të madh ndonjëherë në Evropë, 4.3 ton kokainë që kap vlerën e 240 milionë eurove.

Sipas mediave italiane, së bashku me kokainën policia ka sekuestruar edhe 2 milionë euro cash, si dhe makina të grupit kriminal, mes të cilave edhe një kamion.

Ndërkohë prej orëve të para të mëngjesit, mbi 60 financierë janë përfshirë në arrestimin e 38 personave të shpërndarë në Itali, Slloveni, Kroaci, Bullgari, Holandë dhe Kolumbi, të gjithë të akuzuar për trafik ndërkombëtar droge. Mes tyre agjentë, tregtarë me shumicë dhe transportues droge.

Hetimi filloi më shumë se një vit më parë me bashkëpunimin e drejtësisë italiane, policisë kolumbiane, së bashku me agjencinë amerikane të Hetimeve të Sigurisë Kombëtare.

Të gjitha marrëdhëniet midis prodhuesve dhe blerësve të kokainës së Amerikës së Jugut në territorin kombëtar dhe evropian u rindërtuan nga maji 2021 deri në maj 2022.

Thuhet se së Itali, bandat e njohura kriminale të organizuara në Veneto, Lombardi, Lacio dhe Kalabri, menaxhojnë mallin.

Vlerësohet se për 4.3 ton kokainë të sekuestruara janë paguar 96 milionë euro nga grupet kriminale, dhe vlera e shitjes në tregun italian do të kapte shumën prej të paktën 240 milionë euro.

Zyra e Prokurorit Publik në Trieste, Antonio De Nicolo, ka bërë të ditur se detajet e operacionit do të bëhen të ditura gjatë një konference për shtyp që pritet të mbahet në orën 11:30.