Sfidat e Shqipërisë, me kongresmenin Gooden, Berisha: Drejtësi e pavarur dhe luftë kundër karteleve të drogës

Lufta kundër trafikut dhe karteleve të drogës, ishin në fokus të takimit që Kryetari i Partisë Demokratike, Sali Berisha, zhvilloi në Dallas me anëtarin e Komitetit për Drejtësinë dhe Komitetit të Sigurisë në Kongresin e SHBA, kongresmenin republikan Lance Gooden, ku u diskutua për zhvillimet politike në Shqipëri, sfidat e vendit dhe forcimi i marrëdhënieve strategjike me Shtetet e Bashkuara.

Kongresmeni Gooden shprehu interes për një drejtësi të pavarur, e cila nuk përdoret për përballje politike ndërsa Berisha theksoi se miqësia dhe partneriteti me Shtetet e Bashkuara është një garanci të rëndësishme për demokracinë, lirinë dhe të ardhmen europiane të Shqipërisë.

Reagimi i plotë:

Në vijim të takimeve në Dallas, patëm kënaqësinë të takonim dhe kishim një mëngjes pune me Kongresmenin republikan Lance Gooden, anëtar i komitetit për drejtësinë në Kongresin e SHBA si dhe anëtar i komitetit të Sigurisë.

Një takim miqësor dhe një bisedë e hapur mbi zhvillimet politike, sfidat me të cilat përballet Shqipëria dhe rëndësinë e marrëdhënieve të forta mes Shqipërisë dhe Shteteve të Bashkuara.

Marrëdhëniet strategjike me SHBA dhe mbështetja për anëtarësimin në NATO kanë qenë arritje historike. Sot siç kërkon dhe Sekretari Rubio lufta kundër trafikut dhe karteleve të drogës dhe bashkëpunëtorëve të tyre janë në qendër të marrëdhënies ndermjet dy vendeve.

Një interes të veçantë Kongresmeni Gooden tregoi për një drejtësi të pavarur e cila nuk përdoret për të luftuar kundërshtarët politikë.

Miqësia dhe partneriteti me Shtetet e Bashkuara mbeten një garanci e rëndësishme për demokracinë, lirinë dhe të ardhmen europiane të Shqipërisë.