SHBA i dhuron shtatë dronë Policisë së Kosovës

Policia dhe Inspektorati Policor i Kosovës ka pranuar donacionin me shtatë dronë nga Shtetet e Bashkuara.

Duke falënderuar Shtetet e Bashkuara për furnizimin dhe për mbështetjen, Drejtori i Policisë, Gazmend Hoxha, vlerësoi jashtëzakonisht të nevojshëm dhe të çmueshëm donacionin nga SHBA.

“Do të ndikojë në ngritjen e kapaciteteve të Policisë. Po ashtu edhe në monitorimin e kufijve dhe hetime. Janë dronë dhe pajisje që janë përzgjedhur dhe selektuar nga ekspertët e Policisë së Kosovës. Unë mund të garantoj ambasadorin (Jeffrey Hovenier, SHBA), që Policia të gjitha këto pajisje do t’i përdorë për qëllime të ligjshme në mënyrë që të sigurojë shërbime më kualitative për të gjithë qytetarët,” tha Gazmend Hoxha ndërsa Ambasadori amerikan në Prishtinë, Jeffrey Hovenier, dronët që u pranuan nga policia, i ka cilësuar burim jetik për organet e zbatimit të ligjit në Kosovë.

“Sigurojnë mbikëqyrje dhe ofrojnë mbështetje taktike për misionet policore,” tha Ambasadori Hovenier duke saktësuar se dronët mund të përdoren për të luftuar kontrabandimin e migrantëve, narkotikëve e të tjera ndërsa këtë donacion e konsideroi si vazhdimësi e qëndrimit mbështetës të SHBA-së për Kosovën.

Drejtori i Inspektoratit Policor të Kosovës, Taulant Hodaj, tha se pajisje të tilla do t’i ndihmojnë që ta mbajnë lartë profesionalizmin dhe ta monitorojnë punën e Policisë.

“Si IPK po mundohemi që të jemi të përkushtuar që ta mbajmë nivelin e profesionalizmit të Policisë së Kosovës. Mbështetja me këshilla e me pajisje, ka bërë që të ngritet profesionalizmi për Policinë e Kosovës,” tha Taulant Hodaj duke përfunduar.

“Pajisje të tilla siç janë këta dronë, do na ndihmojë që ta mbajmë lartë profesionalizmin dhe ta monitorojmë punën e Policisë.”