SHBA ndryshon strategji në Evropë, Biden: NATO do të forcohet në tokë, ajër dhe det!

Presidenti amerikan Joe Biden tha se Shtetet e Bashkuara do të ndryshojnë strategjinë ushtarake në Evropë, për shkak të pushtimit rus në Ukrainë.

Duke folur pasi është përshëndetur me Sekretarin e Përgjithshëm të NATO-s Jens Stoltenberg, në Samitin e Aleancës që është duke u mbajtur në Madrid, Biden tha se Shtetet e Bashkuara do të rrisin numrin e armëve shkatërruese që kanë në Spanjë në gjashtë, nga katër sa kanë aktualisht.

Përveç tyre, Washingtoni do të dërgojë dy skuadrilje shtesë F-35 në Britani dhe do të krijojë një bazë ushtarake në Poloni.

Aleanca, citon RFE Presidentin e SHBA, është më e nevojshme se kurrë më parë, dhe NATO do të forcohet në të gjitha drejtimet – në tokë, ajër dhe det.

Stoltenberg nga ana e tij tha në nisje të Samitit se NATO po përballet me sfidat më të mëdha prej Luftës së Dytë Botërore, pas fillimit të pushtimit rus në Ukrainë, duke shtuar se Moska përbën kërcënim të drejtpërdrejtë për sigurinë e vendeve anëtare të aleancës.

Stoltenberg tha se aleatët do të takohen në “kohën e krizës më serioze”, duke shtuar se “samiti do të jetë historik dhe transformues”.

“Ne do të deklarojmë qartë se Rusia përbën kërcënim për sigurinë tonë”, ka thënë Stoltenberg.

Përditësimi i fundit i politikave të NATO-s është bërë më 2010.

Lufta në Ukrainë ka krijuar një atmosferë të re brenda aleancës perëndimore, pas disa viteve të mospajtimeve të brendshme dhe rritjes së tensioneve mes Shteteve të Bashkuara dhe Evropës, në kohën kur Donald Trump ishte President i SHBA.

Presidenti rus Vladimir Putin, ka urdhëruar pushtimin e Ukrainës më 24 shkurt. Ai e quan luftën si “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.