Shefi i shërbimit të zbulimit të ushtrisë izraelite jep dorëheqje

Ushtria izraelite njoftoi sot dorëheqjen e shefit të drejtorisë së saj të zbulimit për shkak të sulmit të Hamasit në Izrael me 7 tetor të vitit të kaluar.

Gjeneralmajori Aharon Haliva ka marrë tashmë publikisht përgjegjësinë për dështimet e shërbimeve të zbulimit rreth sulmit në të cilin Izraeli thotë se militantët e Hamasit vranë 1200 njerëz dhe morën peng rreth 250 veta.

Ushtria publikoi sot një letër dorëheqjeje nga zoti Haliva dhe tha se ai do të tërhiqet dhe pensionohet sapo të emërohet zëvendësuesi i tij.

In coordination with the Chief of the General Staff, the Head of the Intelligence Directorate, MG Aharon Haliva, has requested to end his position, following his leadership responsibility as the Head of the Intelligence Directorate for the events of October 7.

The Chief of the…

— Israel Defense Forces (@IDF) April 22, 2024

“Drejtoria e zbulimit nën komandën time nuk e përmbushi detyrën që na ishte besuar. E mbaj atë ditë të zezë mbi supe që atëherë, ditë pas dite, natë pas nate. Do ta mbaj dhimbjen me vete përgjithmonë,” thekson Haliva në letër.

Zoti Haliva është zyrtari i parë i lartë që jep dorëheqjen në lidhje me sulmin, të cilit Izraeli iu përgjigj me një fushatë në Rripin e Gazës për të cilën thotë se synon të eliminojë Hamasin dhe të sigurojë që militantët të mos kryejnë një sulm tjetër ndaj Izraelit.

Fushata izraelite ka lënë pjesën më të madhe të Gazës në gërmadha dhe ka detyruar rreth tre të katërtat e popullsisë së Gazës të largohen nga shtëpitë e tyre, sipas Kombeve të Bashkuara.

Ministria e Shëndetësisë e Gazës thotë se veprimet ushtarake izraelite kanë vrarë më shumë se 34,000 palestinezë, dy të tretat e tyre gra dhe fëmijë./VOA/