Shenzhen, ndalohet konsumimi i mishit të qenit dhe maces

Në qytetin kinez Shenzhen është ndaluar konsumimi i mishit të qenit dhe maces në kuadër të parandalimit të tregimit të kafshëve të egra për shkak të pandemisë së koronavirusit.

Shkencëtarët dyshojnë se koronavirusi është bartur tek njerëzit nga kafshët. Është konstatuar se ndër të parët që janë infektuar ishin ata që kishin vizituar tregun e kafshëve të egra në Wuhan, ku shiteshin lakuriqët, gjarpërinjtë, qentë, macet dhe kafshët tjera.

Ndalimi i konsumimit të mishit të qenit dhe maces më 1 Maj

Autoritetet kineze në qendrën teknologjike jugore kanë bërë të ditur se ndalimi i konsumimit të mishit të qenit dhe maces do të hyjë në fuqi nga 1 Maji.

“Qentë dhe macet kanë vendosur marrëdhënie shumë më të afërt me njerëzit se sa kafshët tjera, e ndalimi i konsumimit të mishit të qenit dhe maces është një praktikë e zakonshme në shtetet e zhvilluara si Hong Kongu dhe Taiwani,” thuhet në urdherin e autoriteteve vendore duke saktësuar:

“Ky ndalim është në përputhje edhe me kërkesën dhe frymën e civilizimit njerëzor.”

Ndryshe, organi më i lartë ekzekutiv kinez nga fundi i muajit shkurt ka vendosur të ndaloi tregtimin dhe konsumimin e kafshëve të egra.

Autoritetet krahinore dhe lokale po mundohen të zbatojnë këtë urdhër, por Shenzheni ishte më konkret duke e zgjeruar këtë ndalesë për qentë dhe macet. Ndryshe, me koronavirus janë infektuar mbi 935 mijë persona në botë ndërsa kanë vdekur mbi 47 mijë.