Shkatërruan spitalin më të madh në Gazë, OBSH: U shkul zemra e sistemit shëndetësor

Organizata Botërore e Shëndetësisë, OBSH, tha sot se me shkatërrimin e spitalit Al Shifa në Gazë u “shkul zemra” e sistemit shëndetësor të enklavës së shkatërruar palestineze.

“Shkatërruan Al Shifan do të thotë shkulën zemrën e sistemit shëndetësor,” tha zëdhënësja e OBSH, Margaret Harris.

“Ishte ky një vend ku njerëzit shkonin për atë lloj kujdesi që e ofron vërtetë një sistem i mirë shëndetësor, të cilin ne e presim në shoqërinë tonë nëse na duhet,” tha Harris.

Forcat izraelite janë larguar dje nga spitali Al Shifa në qytetin e Gazës pas një operacioni dyjavor të forcave speciale, duke ndaluar qindëra të dyshuar militantë palestinezë dhe duke lënë gërmadhat e godinave të shkatërruara.

“I shkatërruar i tëri”

Pak kohë pasi u tërhoq ushtria izraelite, shefi i urgjencës në veri të qytetit tha se në kompleksin e spitalit të shkatërruar Al Shifa, të vdekur ka gjithandej dhe askush nuk është kursyer. Spitali Al Shifa, më i madhi në Rripin e Gazës, është në gërmadha, është shkatërruar i tëri, tha për AFP, shefi i urgjencës, Fares Afanah.

“Masakrimi i civilëve dhe fëmijëve duhet të ndaloj. Askush nuk u kursye. Ekipet mjekësore vazhdojnë të mbledhin trupa të pajetë dhe të plagosur përreth dhe brenda kompleksit spitalor. Kjo që po ndodhë këtu është katastrofë kundër njerëzimit dhe sistemit shëndetësor në Rripin e Gazës,” tha Fares Afanah.

“Do të varrosemi këtu dhe nuk largohemi”

Godinat në kompleks janë djegur dhe shkatërruar, shtoi ai duke kritikuar hakmarrjen e forcave të okupatorit ndërsa ftoi botën që të ndaloj masakrimin e popullit palestinez.

Një njeri tregoi trupat e pajetë që ishin hedhur kudo nëpër rrugë. “Nuk ka asnjë krevat,” tha ai duke refuzuar ta thotë emrin. “Do të varrosemi këtu dhe nuk largohemi.”

Një punonjës i urgjencës tha se “është i befasuar me heshtjen e jashtëzakonshme të bashkësisë ndërkombëtare dhe botës arabe” dhe pyet:

“Kur do të lëvizin? Kur të jetë shfaorsur i gjithë populli palestinez?”