Shkrumbohet anija e peshkimit dhe disa varka

Anija e peshkimit, pronë e një shtetasi rus është shkrumbuar e tëra pas zjarrit i cili shpërtheu rreth orës 05:00 të mëngjesit në portin e Tivarit. Zjarri përfshiu edhe disa varka druri.   

Rrethanat e shpërthimit të zjarri në pjesën e Kantierit tek Lukobrani ende nuk dihen, raporton Televizioni publik i Malit të Zi, RTCG.

Zëdhënësi i Prokurorisë në Tivar, Radovan Gjurishiç tha se eksperti ligjor për zjarre, shpërthime dhe avari do të përcaktoj shkakun e shpërthimit të zjarrit.

“Sipas të dhënave të para nga mjetet lundruese, në gjendje të rregullt ishte vetëm anija e shtetasit rus, i cili ishte në remont, në pjesën tokësore,” tha Gjurishiç.

Shefi i Shërbimit të Mbrojtjes të komunës Tivar, Amir Muslliç tha se zjarrfikësit kishin marrë një telefonatë për ndërhyrje në orën 05:19. Për shkak të erërave të forta, zjarri ka kaluar nga anija ruse në varkat e vjetra prej druri që ishin pranë. Zjarri është lokalizuar pas rreth 90 minutave. Shkaqet e zjarrit do ti konstatoj hetimi.”