Shpallet në kërkim 25-vjeçari, kanosi me armë një shtetas…

Policia e Elbasanit ka shpallur në kërkim një shtetas 25 vjeçar që dyshohet se pas një konflikti ka kanosur me armë një 32-vjeçar.

Sipas policisë së Elbasanit, sherri ka nisur për “motive të dobëta”.

“Shërbimet e Policisë Elbasan, kanë marrë njoftim se në lagjen “Shënkoll” ka një konflikt mes dy të rinjve, ku njëri prej tyre dyshohet se ka dhe armë zjarri.

Menjëherë shërbimet e Policisë kanë shkuar në vendngjarje, ku E. V, sapo ka parë Policinë ka hedhur armën e zjarrit dhe është larguar me shpejtësi.

Nga veprimet e kryera nga grupi hetimor, ka rezultuar se 25 vjeçari pas një konflikti për motive të dobëta ka kanosur me armë zjarri A.Sh., 32 vjeç, banues në Elbasan”, thuhet në njoftimin zyrtar.

Policia shtoi se vijon puna për kapjen e shtetasit të shpallur në kërkim, ndërsa në cilësinë e provës materiale u sekuestrua arma e zjarrit tip “Pushkë” dhe 7 fishekë.

Materialet në ngarkim të 25-vjeçarit i kaluan Prokurorisë së Rrethit Gjyqësor Elbasan për veprime të mëtejshme për veprat penale “Kanosja” “Prishja e qetësisë publike”, “Prodhimi dhe mbajtja pa leje e armëve të zjarrit” të parashikuar nga nenet 84, 274, dhe 278, të Kodit Penal.