Shpërthime të fuqishme, Kryebashkiaku Spahia: Shkodra nuk i përkulet krimit!
Pas dy shpërthimeve të fuqishme që zgjuan mëngjesin e sotëm qytetin e Shkodrës, ka reaguar Kryetari i Bashkisë Bardh Spahia duke e bërë të qartë se Shkodra nuk i përkulet krimit!
“Dënoj me forcë aktet kriminale që tronditën Shkodrën mëngjesin e kësaj të shtune. Skena të tilla, kriminale me eksploziv, ndaj banorëve të Shkodrës, jo vetëm dëmtojnë imazhin e këtij qyteti por rrisin frikën dhe pasigurinë e shkodranëve për të jetuar dhe punuar në qytetin e tyre,” thekson Kryetari i Bashkisë Shkodër, Bardh Spahia, duke i ftuar institucionet ligjzbatuese të zbardhin urgjent këto ngjarje kriminale, që nuk janë të Shkodrës, por të krimit që ka marrë peng qeverinë!
Ndryshe, shpërthimi parë është dëgjuar rreth orës 02.20 dhe vetëm pas 10 minutash është dëgjuar shpërthimi tjetër. Mësohet se lënda plasëse është vendosur në dy biznese ndërkohë policia ka dhënë dhe një njoftim paraprak:
“Rreth orës 02:20, në derën e supermarketit në pronësi të shtetasit F.M. në lagjen ” Kongresi i Permetit” si dhe në derën e një biznesi tjetër privat butik rrobash në pronësi të shtetasit Xh.B. në lagjen “Vasil Shanto”, është vendosur lëndë plasëse dhe si pasojë e shpërthimit të tyre kanë shkaktuar vetëm dëme materiale.
Grupi hetimor nën drejtimin e Prokurorisë vijon veprimet duke administruar çdo provë dhe duke vlerësuar çdo informacion, me qëllim zbardhjen e plotë të ngjarjeve, identifikimin dhe kapjen e autorit/ëve,” thuhet në njoftimin e policisë.
Mësohet se njëri prej shpërthimeve ka ndodhur në biznesin e kandidatit të Lulzim Bashës për Kryetar të Bashkisë Shkodër në zgjedhjet e 6 Marsit, Xhemal Bushati.
Ndërsa këto shpërthime vijnë dhe një ditë pas emërimit dhe rikthimit si Prefekte të Shkodrës, Majlinda Angonit. Ajo ishte dorëhequr për tu futur në garë për Kryetar të Bashkisë Shkodër, ku doli humbëse në zgjedhje për tu emëruar dje nga Kryeministri Edi Rama në detyrën e Prefektes së Qarkut Shkodër.
Reagimi:
Dënoj me forcë aktet kriminale që tronditën Shkodrën mëngjesin e kësaj të shtune. Skena të tilla, kriminale me eksploziv, ndaj banorëve të Shkodrës, jo vetëm dëmtojnë imazhin e këtij qyteti por rrisin frikën dhe pasigurinë e shkodranëve për të jetuar dhe punuar në qytetin e tyre.
Ftoj institucionet ligjzbatuese, Policinë dhe Prokurorinë, të zbardhin në mënyrë urgjente këto ngjarje kriminale, që nuk janë të Shkodrës, por të krimit që ka marrë peng qeverinë!
Shkodra nuk i përkulet krimit!
