Shqipëria e zhytur në skandale, korrupsion e varfëri, Berisha: Sot Edi Rama është në panik dhe pa shpresë!

Sot Edi Rama është në panik dhe pa shpresë, tha Kryetari i Partisë Demokratike, Sali Berisha, duke vlerësuar se Shqipëria është e zhytur në skandale me përmasa europiane, korrupsion dhe rritje të varfërisë.

Edhe sot, në bashkëbisedim me qytetarët përmes rrjeteve sociale, Kryetari i Partisë Demokratike i bëri thirrje demokratëve dhe jo vetëm, që në 8 Maj të bashkohen në protestën më të fuqishme që ka njohur Shqipëria.

“Sot Edi Rama është në një panik të vërtetë, e konsideron veten, në fakt ashtu sic është, pashpresë, por ndërkohë bën gjithçka për t’u mbajtur në fijen e barit. Ju e konstatoni e shihni se skandalet e tij kanë marrë dheun. Janë bërë europiane dhe botërore. Vjedhjet e tij dhe plaçka e pasurive publike nuk ka të ndalur.

Qëndrimi i tij ndaj shqiptarëve në një kohë të vështirë kur çmimet po rriten për shkak të krizës së krijuar nga lufta në Lindjen e Mesme, në Shqipëri godasin masivisht shqiptarët, por Shqipëria është vendi i vetëm në Evropë që de facto nuk ka marrë asnjë masë lehtësuese.

Miliardat që inkasohen nga rritja e TVSH-së dhe që u merren nga xhepat e shqiptarëve po rriten gjithnjë e më shumë. Ndërkohë fermerëve shqiptarë ju hiqet edhe subvencioni i naftës që kishin. Pra, një indiferencë totale e tij ndaj fermerëve, një indiferencë e madhe ndaj pensionistëve, ndaj atyre të cilët nuk mjekohen dot me pensionin që marrin as 15 ditë në muaj. Indiferencë totale ndaj atyre që janë në ndihmë ekonomike dhe që u thuhet të jetojnë me 34 euro në muaj.

Një indiferencë totale ndaj të gjithë atyre që përdorin transportin publik, asnjë subvencion, ndërkohë kompanitë kanë përgjysmuar përdorimin e autobusave për shkak të krizës,” tha Sali Berisha gjatë një bashkëbisedimi me qytetarët përmes rrjeteve sociale duke konstatuar se kemi të bëjmë me një qeveri e cila funksionon vetëm për vete, funksionon vetëm e vetëm për pasurimin e anëtarëve të saj e rrethit të tyre familjar.

“Ligji që parandalon, që mbron qytetarët nga abuzimi i zyrtarëve me pasuritë e tyre quhet ligji i konfliktit të interesit. Ky ligj është rrafshuar me zero. Ky ligj nuk ekziston më. Shembullin më së pari e dha vetë Edi Rama, kur ai me firmën dhe vulën e tij i ka dhënë vëllait të vet 38.000 m2 tokë. Kur ai ka shtrirë dorën e tij të zezë në të gjitha këto koncesione.

Miq, çdo koncesion i tij del një vjedhje e madhe e përmasave të jashtëzakonshme. Por ai nuk u ngop vetëm me koncesionet. Gropa e madhe e zezë familjare e tij është AKSHI. AKSHI-n në të cilin Edi Rama, Linda Rama dhe Armand Frangu kanë patur minierën e Floririt. Kanë plaçkitur shqiptarët në qindra e qindra milionë euro. Për të realizuar këtë plaçkitje të madhe, Edi Rama në vitin 2017 nxorri një vendim qeverie me të cilin të gjitha tenderat në fushën e IT-së të të gjitha drejtorive, agjencive, ministrive të vendit do t’i bënte tashmë vetëm AKSHI. Në mënyrë që AKSHI të mos kishte më pak qindra milionë, por shumë e shumë qindra milionë tendera.
Ergys Agasi, ju e morët vesh që vera 33.000 euro që i dhurohej Edi Ramës për dreka dhe darka shoqërohej me 200.000 të tjera. Pra, kutia e verës përmbante vetëm një shishe dhe pjesa tjetër mbushej me 500-she euro. E megjithatë, Ergys Agasi apo Alias Ergys, Edi Rama, Alias Ergys Agasi, është i lirë, shëtit i lirshëm, shoqërohet nga policia, vazhdon punimet në pronat e sekuestruara. Ligji pra nuk ekziston,” tha Kryetari i Partisë Demokratike, Sali Berisha, duke konstatuar se ajo që mbetet, mbetet revolta qytetare.

“Ndaj dhe e mbyll me thirrjen më vëllazërore për çdo qytetar shqiptar të bashkohemi me datën 8 maj në protestën më të fuqishme që ka njohur Shqipëria, në kryengritjen më të fuqishme paqësore kundër këtij regjimi.”