Shqiptari alarmon policinë italiane, harron valixhen në një stacion hekurudhor

Një valixhe e braktisur në një stacion hekurudhor në Ostuni, Brindisi, ka vënë në alarm policinë italiane.

Sipas medias lokale, një telefonatë e çuditshme njoftoi policinë se në stacionin hekurudhor ndodhej një valixhe e dyshimtë.

Menjëherë u evakuua zona dhe u vendos perimetri i sigurisë.

Gjithashtu mësohet se shërbimi hekurudhor është ndërprerë, por më pas kur po bëhej gati ndërhyrja për të hyrë në zonën e ‘rrezikut’, një person ka kaluar dhe ka deklaruar se ishte valixhja e tij.

Ishte pikërisht 42-vjeçari shqiptar, i cili ka pohuar se është valixhja tij, por identiteti i shqiptarit nuk bëhet e ditur.

Ai tha se e kishte harruar valixhen ndërsa ishte shkëputur për të konsumuar diçka. Gjithsesi shqiptari u shoqërua në polici për tu pyetur ndërsa hetimet i morën përsipër agjentët e anti-terrorizmit të Leçes.

Pas 40 minutash u rikthye edhe shërbimi publik në stacionin e trenit.