Shteti i sëmurë i Edi Ramës!

Që nga momenti që u ul në fronin e ministrit, Edi Rama filloi të akuzohet si një njeri i sëmurë, por, 26 vjet pas rrugëtimit të këtij njeriu në pushtet, sot kur shqiptarët po shohin çdo ditë e më shumë ministra të tij në pranga dhe një pangopshmëri të pushtetarëve që çdo ditë rritet e më shumë ndërsa tirani është në kërkim të shpalljes së armiqve që po i dalin në rrugë, me keqardhje konstatohet se i sëmurë është i gjithë shteti që Rama drejton!

Ato që Platoni në veprën e tij “De Republica” i konsideron sëmundje të shtetit, mund të konstatojmë në rrugëtimin e qeverisjes komuniste që nga viti 1944 kur partia e Edi Ramës mori pushtetin, e deri më sot,

Timokracia, oligarkia, demokracia dhe tirania janë katër forma të rendit shtetëror që janë më të këqija se shteti. Që të tre këto rende, Platoni i konsideron sëmundje të shtetit, dhe çuditërisht ngjajnë si katër pika uji me Shqipërinë ndonëse janë përkufizime që i ka bërë shumë kohë më parë filozofi i njohur.  

-Timokracia: Aristokracia kalon në timokraci kur vjen deri tek përçarja në mes të sundimtarëve!

Këtë shqiptarët arritën ta shohin me rastin e sundimit të Enver Hoxhës me shokët e tij kriminelë, kur panë se shteti nuk është thjeshtë vetëm qeverisje, kishte shumë facilitete, përfitime dhe ndarje; Dhe, filluan të vriten në mes vete!

Kur vrasjet në mes vete nuk po ndalonin dhe shteti komunist po jepte grahmat e fundit në kulmin e tensionimit me popullin pa bukë, u shpik tranzicioni ndonëse të pasurit vazhduan të jenë po ata, por, me para në duart e të tjerëve!

-Oligarkia: Ai rend i cili bazohet në vlerësimin e pasurisë, ku sundojnë të pasurit, ndërsa të varfrit nuk marrin pjesë në pushtet. Ky shtet është me disa nivele, sepse është i ndarë në të pasur dhe  të varfër dhe ata jetojnë në armiqësi.

Këtë sëmundje shqiptarët arritën ta shohin gjatë këtij tranzicioni ku injorantë që shisnin çamçakëz, kasetofonë ose naftë me bidon, u shfaqën si njerëzit më të pasur në Shqipëri. Këtë realitet nuk e besoi njeri në këtë tokë, filluan konspiracionin mbi njerëzit që qëndrojnë prapa këtyre njerëzve dhe i vetmi njeir që doli hapur pa i lëvizur qerpiku ishte i biri i diktatorit Enver Hoxha!

Sot Oligarkia sundon dhe pasurohet në kurriz të shqiptarëve, SPAK heton dhe arreston disa burokrat shtetërore, por, deri më sot kjo nuk ka ndodhur me asnjërin prej oligarkëve edhe pse shesin fabrika vaji dhe hapin në Mal të Zi, blejnë spitale që nuk i mbajnë dot as firmat e njohura mjekësore, blejnë dhe hotele që nuk i menaxhojnë dot në tregun shqiptar edhe kompanitë me shumë përvojë, madje blejnë dhe banka që nuk kanë as treg!   

-Demokracia: Oligarkia i çon njerëzit deri në rrënim të plotë. Kur të varfrit e shohin se sundimtarët janë të këqinjë dhe të paaftë, nisen në rebelim kundër tyre. Demokracia lind kur të varfrit ngadhënjejnë ndaj të pasurve. Në fillim do të sundoj liria dhe secili do të bëjë çfarë të dojë. Njeriu demokratik lind nga ai oligarkik, kur ndonjëra prej rebelimeve të tij merr ndihmë nga jashtë, vjen deri te konflikti i brendshëm. Në varësi nga rrethanat, fiton herë njëra e herë pala tjetër. Ky lloj njeriu vjedh, drejton atë që është në fron.

Kështu e thotë Platoni por shqiptarët e kanë përjetuar në lëkurën e tyre, janë rebeluar, kanë krijuar idenë se kanë ngadhënjyer, janë ndjerë madje edhe të lirë, dhe me ndihmë nga jashtë rrëzuan bustin në vitin 1991 dhe i vunë flakën edhe vendit më 1997, duke kërkuar paratë e tyre që humbën në firmat piramidale.

Dhe, natyrisht, jo pse e thotë Platoni, por, ky lloj shqiptari vodhi, u bë i pasur dhe filloi ta drejtoi njeriun që ulej në fronin e të parit të shtetit.  

-Tirania: Pangopshmëria për atë që më së shumti vlerësohet, shkatërron rendin shtetëror. Oligarkinë e shkatërroi pasurimi, e demokracinë do ta shkatërroj liria. Të gjithë do të bëhen të njejtë, të vjetërit do të fillojnë të kenë frikë nga të rinjtë, të huajt barazohen me autoktonët. Populli zgjedhë sundimtarin e ri i cili bëhet tiran. Kur vjen në pushtet, gjithmonë fillon ndonjë luftë në mënyrë që populli të ketë nevojë për udhëheqës, kështu njerëzit do të varfërohen dhe do të merren me veten e tyre, dhe në luftë do të shkojnë të papërgatitur. Tirani, kështu, është gjithmonë i kujdesshëm dhe shikon nëse ka armiq që do ti dalin në rrugë!

A thua ta ketë lexuar Edi Rama “De Republica” të Platonit?!

Kjo nuk mund të thuhet me siguri, por, me siguri mund të thuhet se Edi Rama është ky tirani që u krijua në këtë shtet të goditur nga sëmundja e Tiranisë, pas Timokracisë, Oligarkisë dhe Demokracisë!