Sot, ata që i thonë bukës bukë e ujit ujë, protestojnë!

Sot para Kryeministrisë, me fillim në orën 19:00 në Tiranë, opozita zhvillon Protestë Kombëtare me kërkesën kryesore: Dorëheqjen e Kryeministrit Edi Rama!

Sot Edi Rama duhet të ikë nga Zyra e Kryeministrit sepse erdhi duke akuzuar Kryeministrin për manipulim zgjedhor me kërkesën “Hap kutitë ose largohu”, dhe, me ardhjen në pushtet, ishte vetëm ai dhe banda e tij që vendosën se kush do ti hap kutitë dhe kush do të largohet!

Sot Edi Rama duhet të ik nga ky fron jo pse e thotë Partia Demokratike me Sali Berishën, por, sepse kur u fronëzua e akuzonte pushtetin për korrupsion, dhe shteti nën qeverisjen e tij u bë shteti më i korruptuar në Evropë!

Sot Edi Rama duhet të ikë një orë e më parë sepse erdhi në pushtet duke akuzuar pushtetin se po shtyp opozitën, dhe vetë ai si Kryeministër e zhduku opozitën fare nga gara zgjedhore duke e caktuar Opozitën që atij i duhet për të qëndruar në pushtet!

Sot Edi Rama duhet të ikë një minut e më parë sepse erdhi në pushtet duke akuzuar qeverinë që nuk kujdeset për Diasporën Shqiptare dhe me t’u ulur në fron e zhduku fare dhe mblodhi gjithë spiunët e Sigurimit të Shtetit jashtë shtetit për të siguruar votat elektorale, dhe për ta kurorëzuar më në fund me një Samit të Diasporës ku dhe shefi i diplomacisë u tha qartë se nuk ju duhet një Diasporë që u thotë se po vjedhin, kur ata e dinë se po vjedhin!

Sot Edi Rama duhet të ikë një sekondë e më parë sepse erdhi në pushtet duke akuzuar Sandrin e TV Klan se po mbronë pushtetin, dhe sot jo vetëm Sandri i TV por të gjitha mediat propagandojnë pushtetin komunist të Edi Ramës duke i përcaktuar madje dhe analistët në panelet e tyre të debatit, ndryshe të gjithë ata që dalin nga linja i tërheqin zvarrë jashtë, sikur që ndodhi së fundi në televizionin më bolshevik në Ballkan, TCH, ku njeriu që i kishte shërbyer Ramës deri në rrëzimin e Sali Berishës, guxoi të thotë një fjalë tashmë nën petkun e Drejtorit të mediave në PD, jashtë skenarit, të largohet edhe pa bisht nën shalë!

Sot Edi Rama duhet të ikë nga posti i Kryeministrit sepse erdhi në pushtet për ta integruar Shqipërinë në Bashkimin Evropian, dhe i hapi Ballkanin duke e futur në Serbi!

Sot, të gjithë ata që i thonë bukës bukë e ujit ujë, duhet të protestojnë kundër të gjithë belindave, tigrave dhe morrave të kuq që për 13 vjet u vjedhën paratë duke ju thënë se janë të pafajshëm dhe akuzat e opozitare janë kot, ndryshe, SPAK do ti akuzonte; Dhe, në momentin kur Prokuroria e Posaçme i akuzoi, i gjithë onturazhi i Edi Ramës filloi të akuzojë prokurorët e kësaj Prokurorie; Së fundi, edhe Kryeprokuroren Ina Rama me të cilën e bënë pis dhe e përgjakën Revolucionin e 21 Janarit 2011, akuzuan pushtetin, për të cilën ngjarje pa dëshmi gjetën mënyrën të zhdukin përmes vettingut po me ketë vegël komuniste, të gjithë ata prokuror dhe gjyqtarë që nuk dënuan njeri pa dëshmi, vetëm pse kështu kërkonte Opozitari Rama me dëshminë e spiunëve të tij në Gardën e Republikës!

Ndërkohë mësohet se Protesta Kombëtare do ti kthehet sot skenarit të zakonshëm të protestave me fjalime nga drejtues të PD dhe protagonistë opozitarë përpara Kryeministrisë, në vend të marshimit nëpër Tiranë i cili u aplikua në protestat e fundit.

Ndërsa Policia e Shtetit ka bërë të ditur se përfaqësues të Partisë Demokratike të Shqipërisë kanë njoftuar Policinë e Tiranës për zhvillimin e një tubimi, më datë 17.04.2026, nga ora 19:00 deri në orën 22:00, në Bulevardin “Dëshmorët e Kombit”, para godinës së Kryeministrisë.

“Në bazë të ligjit “Për tubimet”, Policia e Tiranës ka marrë masat me qëllim garantimin e mbarëvajtjes së tubimit në vendin dhe afatin kohor të kërkuar.

Në zbatim të këtyre masave, ditën e sotme dhe të nesërme, do të kufizohet lëvizja në disa akse/segmente rrugore,” thekson Policia e Shtetit duke saktësuar:

– Nga ora 23:45 e datës 16.04.2026 deri në përfundim të tubimit, do të bllokohet lëvizja dhe nuk do të lejohet parkimi i automjeteve në bulevardin “Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”;

– Nga ora 15:00 e datës 17.04.2026 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Në fund, ndonëse Policia e Shtetit ishte ajo që në protestat e fundit prodhoi dhe nxiti veprime të kundërligjshme që cenojnë rendin dhe sigurinë publike, sot apeloi që qytetarët të distancohen në rast se gjenden përballë veprimeve të kundërligjshme .