Sot festohet Fitër Bajrami
Sot festohet Fitër Bajrami!
Falja e Namazit të Bajramit do të bëhet në orën 06:55 në Sheshin “Skënderbej” në Tiranë nën drejtimin e Kryetarit të Komunitetit Mysliman të Shqipërisë, Hoxhë Bujar Spahiu.
Duke uruar besimtarët festën e përmbylljes me sukses, me lejen e Zotit, të një rrugëtimi të përsosjes shpirtërore, Hoxhë Bujar Spahiu u shpreh se Zoti i gjithësisë qoftë i kënaqur me ne dhe na e pastë pranuar agjërimin, lutjet dhe të gjitha adhurimet gjatë këtij muaji të bekuar, të cilin po e përcjellim sot
“Fitër Bajrami është festa e përmbylljes me sukses, me lejen e Zotit, të një rrugëtimi të përsosjes shpirtërore. Bajrami është lumturia që ne ndiejmë me plotësimin e agjërimit të Ramazanit si dhe falenderimi ndaj Zotit për mirësitë që na ka begatuar,” shprehet Hoxhë Bujar Spahiu në urimin e tij me shpresën e fitimit të kënaqësisë së Zotit dhe pranimit të agjërimit, lutjeve dhe të gjitha adhurimeve gjatë këtij muaji të bekuar, që po e përcjellim sot ndërsa përfundoi:
“E lusim Zotin që vendi ynë, Shqipëria, të bëhet një vend më i mirë, më i begatë e më shpresëdhënës për shqiptarët. Motra dhe vëllezër, ngrohtësia e Bajramit le të sjellë lumturi dhe të mbushë jetën tuaj me gëzim dhe hare. Zoti i Madhëruar ju bekoftë sot, nesër dhe gjithmonë. Paçi një Bajram të begatë! Gëzuar!”
Programi i plotë i Fitër Bajramit:
06:30 – Lexim Kur’ani nga imami i xhamisë “Et’hem Bej”, z. Elton Karaj
06:35 – Fjala përshëndetëse e Kryetarit të KMSH-së, H. Bujar Spahiu
06:45 – Ligjëratë nga Nënkryetari i KMSH-së, z. Lauren Luli
06:55 – Falja e namazit të Bajramit, prin faljen kryetari i KMSH-së, H. Bujar Spahiu
07:00 – Hutbeja e Bajramit nga Myftiu i Tiranës, z. Gazment Teqja
