Sot festohet Kurban Bajrami
Besimtarët myslimanë sot festojnë Kurban Bajramin.
Pas faljes së namazit të Kurban Bajramit në Bulevardin “Dëshmorët e Kombit”në Tiranë, në një ceremoni me lexim Kur’ani, ligjërata dhe përshëndetje, duke uruar të gjithë besimtarët myslimanë, kreu i Komunitetit Mysliman të Shqipërisë, H.Bujar Spahiu, në mesazhin e tij u shpreh se Kurban Bajrami është një festë që i fton besimtarët të largohen nga egoizmi, urrejtja, padrejtësia dhe indiferenca ndaj njëri-tjetrit.
“Kurban Bajrami është festa që na mëson të largohemi nga egoizmi, urrejtja, padrejtësia dhe indiferenca ndaj njëri-tjetrit. Në këtë ditë të shenjtë, Allahu na kujton në Kuranin Famëlartë: ‘O ju njerëz, ne ju krijuam prej një mashkulli dhe një femre, ju bëmë popuj e fise që të njiheni me njëri-tjetrin. Më i miri te Allahu është ai që është më i devotshëm’,” tha kreu i Komunitetit Mysliman të Shqipërisë, H.Bujar Spahiu.
“Ky ajet është një mesazh i madh për të gjithë: të jetojmë me respekt dhe me dinjitet ndaj njëri-tjetrit.”
Në përfundim të ceremonisë, besimtarët shkëmbyen mes tyre urimet më të përzemërta të kësaj dite të mbushur me paqe, dashuri, solidaritet dhe sakrificë.
