Sot kërkimi i ri në Baltimore: “Nuk besojmë se do gjejmë ndonjë të gjallë!”
Sot polumbarët do të vazhdojnë kërkimin përreth gërmadhave të urës që dje u shemb në Baltimore, ku mendohet se gjashtë personat në kërkim tashmë janë të vdekur, thanë autoritetet lokale.
Goditja e anijes me konteiner, që shkakoi shembjen e urës, shkaktoi dhe mbylljen e Portit Baltimore në kohë të pacaktuar. Fjala është për njërin ndër portet me trafikun më të madh në bregun lindor të Shteteve të Bashkuara, kështu dhe katastrofa shkakoi një kaos në trafik në Baltimore dhe rajonin përreth.
Pas shuarjes së shpresave për mbijetesë, kërkimi për gjashtë punëtorët u ndërpre mbrëmjen e së martës, pas 18 orëve që ata kishin rënë nga ura e shembur Francis Scott Key Bridge në ujërat e ftohtë të lumit Patapsco.
Policia e Maryland dhe zyrtarët e Rojes bregdetare të SHBA thanë se është ulur shikueshmëria dhe rrymat gjithnjë e më të rrezikshme në kanal e bënë vazhdimin e kërkimit në lum me risk të madh për të vazhduar edhe gjatë natës.
“Nuk besojmë se do gjejmë ndonjë të gjallë”
Duke filluar mëngjesin e sotëm në orën 06:00, “shpresojmë se polumbarët do të fillojnë një kërkim të detajuar për dhënë gjithçka që është e mundur, që të nxjerrim gjashtë personat e zhdukur,” tha mbrëmë para mediave përfaqësuesi i policisë, Roland Butler.
“Nuk besojmë se do gjejmë ndonjë nga ata persona të gjallë,” tha përfaqësuesi i Rojes bregdetare, Shannon Gilreath.
Ndryshe, dje polumbarët arritën të nxjerrin edhe dy persona të gjallë, njëri prej të cilëve u hospitalizua.
Gjashtë punëtorët për të cilët sot vazhdon kërkimi janë nga Meksika, Guatemala dhe El Salvadori, ka bërë të ditur konsulata meksikane në Washington.
Zyrtarët janë shprehur që të tetë punëtorët ishin pjesë e grupit i cili po mbushte gropat në asfaltin e urës Key Bridge, kur anija me konteiner “Dali” nën flamurin e Singaporit, i cili ishte nisur nga Baltimore drej Sri Lankas, goditi urën rreth orës 1:30.
Anija me gjatësi 289 m kishte raportuar për humbjen e kontrollit të drejtimit para se të godiste urën dhe kishte hedhur spirancën për ta ulur shpejtësinë, duke i dhënë kohë shërbimeve përkatëse që ta ndalojnë trafikun në urë para se ajo të shembej.
Ky paralajmërim, u vlerësua se ka parandaluar vdekjen e një numri më të madh të njerëzve, theksuan autoritetet lokale.
Guvernatori i Marylandit, Wes Moore, tha para mediave mbrëmë se ura nuk kishte probleme strukturore ndërkohë autoritetet përjashtuan mundësinë e një akti terrorist.
