Sot, Kosova, 16 vjet shtet

Sot, Kosova shënon 16 vjetorin e shpalljes së Pavarësisë.

Më 17 shkurt të vitit 2008, në një mbledhje të jashtëzakonshme ku merrnin pjesë 109 nga gjithsej 120 deputetë, Parlament i Kosovës në ora 15:39 miratoi Deklaratën e Pavarësisë duke e shpall Kosovën shtet të pavarur dhe sovran.

Ligjshmëria e Shpalljes së Pavarësisë së Kosovës për një kohë ka qenë temë e diskutueshme. Serbia duke kundërshtuar Deklaratën e Pavarësisë së Kosovës kërkonte vlerësimin e vlefshmërisë ndërkombëtare dhe mbështetje për pozicionin e saj, gjoja se Deklarata e Pavarësisë së Kosovës ishte e paligjshme.

Në vazhdën e kësaj ecurie, në tetor të vitit 2008, Serbia kërkoi një opinion këshillues nga Gjykata Ndërkombëtare e Drejtësisë. Më 22 korrik të vitit 2010, Gjykata Ndërkombëtare e Drejtësisë përmes një Vendimi Këshillëdhënës rikonfirmoi se Deklarata e Pavarësisë së Kosovës nuk ka shkelur asnjë nen të Ligjit Ndërkombëtar.

Shpallja e Pavarësisë së Kosovës më 17 shkurt 2008, ishte kurorëzim i një rrugëtimi të gjatë e të vështirë për qytetarët e Kosovës. Për vite me radhë qytetarët e Kosovës vuajtën pasojat e spastrimit etnik nga regjimi serb i Sllobodan Milosheviçit, gjë e cila rezultoi më një Luftë Çlirimtare 1997-1999. Pas përfundimit të Luftës Çlirimtare të Kosovës u bë edhe vendosja e trupave paqeruajtëse ndërkombëtare në Kosovë.

Për shënimin e kësaj dite, sot, institucionet e Kosovës do të organizojnë këto aktivitete:

08:00 Mbledhje festive e Qeverisë së Republikës së Kosovës

08:20 Ngritja e Flamurit të Republikës së Kosovës

08:30 Nderime te Monumenti i të Pagjeturve

08:45 Homazhe te varri i ish Presidentit Dr. Ibrahim Rugova

08:50 Homazhe te varri i veprimtarit Adem Demaçi

09:50 Homazhe në Kompleksin Memorial ‘Adem Jashari’ Prekaz

11:00 Nderime te Monumenti “Heroinat”

11:15 Nderime te Monumenti i Policëve të rënë në detyrë

11:25 Nderim te pllaka e fëmijëve të vrarë gjate luftës

12:00 Seanca Solemne e Kuvendit të Republikës së Kosovës

17:00 Pritje shtetërore nga Presidentja e Republikës së Kosovës

18:00 Koncerti i Pavarësisë, sheshi i Prishtinës

20:15 Koncerti solemn i Filharmonisë së Kosovës

Ndërkohë do të organizohen pritje zyrtare në përfaqësitë diplomatike dhe konsullore të Republikës së Kosovës.