Sot Meksikë-Afrikë e Jugut hap Botërorin 2026

Sot nis spektakli më i madh i futbollit botëror, Kupa e Botës 2026, që për herë të parë do të organizohet nga tre vende: Shtetet e Bashkuara, Meksika dhe Kanadaja.

Ndeshja hapëse do të luhet në stadiumin legjendar Estadio Azteca në Mexico City, ku përfaqësuesja e Meksikës do të përballet me Afrikën e Jugut. Ky stadium hyn në histori si arena e parë që pret për herë të tretë një ndeshje hapëse të Kupës së Botës.

Edicioni i vitit 2026 shënon një epokë të re për futbollin botëror. Për herë të parë në histori do të marrin pjesë 48 skuadra kombëtare, një zgjerim i rëndësishëm nga 32 ekipet e mëparshme, duke i dhënë mundësi më shumë vendeve të jenë pjesë e skenës më të madhe të futbollit.

FIFA ka paralajmëruar një ceremoni madhështore hapëse në Mexico City, me pjesëmarrjen e artistëve të njohur ndërkombëtarë dhe një program festiv që synon të bashkojë kulturën, muzikën dhe futbollin në një spektakël global.

Ndeshja hapëse e turneut Meksikë-Afrikë e Jugut fillon në orën 21:00, përballje kjo që sjell kujtime nga Botërori 2010, kur këto dy skuadrat u ndeshën pikërisht në fazën e hapjes së kompeticionit. Më pas vëmendja do të zhvendoset në Guadalahara, ku do të përballen Korea e Jugut dhe Çekia. Përfaqësuesja çeke mbërrin në këtë Botëror me moral të lartë pas suksesit të arritur falë “play-off ”-eve të UEFA-s, ndërsa koreanojugorët synojnë të nisin me fitore aventurën e tyre në turne.

Ndryshe, Kupa e Botës 2026 do të zgjasë deri më 19 korrik dhe do të zhvillohet në 16 qytete pritëse, duke sjellë një format të ri me 48 kombëtare dhe 104 ndeshje

Finalja e madhe do të zhvillohet më 19 korrik në stadiumin MetLife në New Jersey në SHBA, ku do të kurorëzohet kampioni i ri i botës.

Miliarda tifozë anembanë globit pritet të ndjekin turneun që konsiderohet si ngjarja më e madhe sportive e vitit, ndërsa emocionet e futbollit botëror rikthehen pas katër vitesh pritjeje.