Sot Parlamenti Evropian debaton për sulmin e 24 shtatorit në veri

Sot në Parlamentin Evropian do zhvillohet një debat i jashtëzakonshëm lidhur me sulmin e 24 shtatorit në veri të Kosovës, ndërsa në seancën plenare të radhës pritet të miratohet një rezolutë.

“Ne dënojmë agresionin e fundit të një bande të armatosur terroriste kundër policëve të Kosovës. Të gjitha faktet rreth sulmit duhet të vërtetohen. Autorët përgjegjës duhet të përballen me drejtësinë”, thuhet në paralajmërimin e socialdemokratëve evropian që iniciuan debatin.

Njëri nga iniciatorët e debatit, eurodeputeti Tonino Picula ka deklaruar se rezoluta e cila pritet të miratohet do prezantojë një vlerësim të qartë të Parlamentit Evropian për marrëdhëniet mes Kosovës dhe Serbisë, dhe pas sulmit të fundit terrorist në veri të Kosovës dhe vrasjes së një polici.

Tonin Picula pohon se përpos përgjegjësisë penale duhet të përcaktohet edhe përgjegjësia politike për përshkallëzimin e fundit të dhunës.

Ai paralajmëron se eurodeputetët do reflektojnë në rezolutë edhe pikëpamjet e tyre për rolin e ndërmjetësuesve evropian në dritën e bllokimit evident në zbatimin e planit për normalizimin e marrëdhënieve.

Debati i inicuar nga socialdemokratët, grupit të dytë më të madh në Parlamentin Evropian, lidhur me sulmin në veri të Kosovës, do të zhvillohet mbrëmjen e sotme ndërsa Rezoluta pritet të miratohet në seancën plenare të radhës, brenda muajit tetor.