Sot protesta në qytetet e Kosovës kundër aktgjykimit të Gjykatës Speciale

Sot në qytetet e Kosovës do të zhvillohen protesta të organizuara nga degët e Organizatës së Veteranëve të Luftës së UÇK-së, pas aktgjykimit të Dhomave të Specializuara të Kosovës në Hagë ndaj ish-krerëve të Ushtrisë Çlirimtare të Kosovës.

Tubimet do të mbahen nën moton “Jo në emrin tim”, ndërsa organizatorët kanë bërë thirrje për pjesëmarrje dhe që protestat të zhvillohen në mënyrë paqësore.

Sipas orarit të publikuar, protestat do të zhvillohen në këto qytete:

Podujevë – 17:00, Sheshi “Zahir Pajaziti”
Istog – 17:00, Parku i Qytetit
Rahovec – 17:00, Sheshi i Qytetit
Deçan – 17:00, Qendra e Qytetit
Gjilan – 17:00, para Teatrit të Qytetit
Kaçanik – 17:30, Sheshi i Qytetit
Drenas – 17:30, Sheshi “Fehmi dhe Xhevë Lladrovci”
Prizren – 19:00, Shadërvan
Prishtinë – 21:00, Sheshi “Skënderbeu”

Sipas OVL-UÇK-së, protestat kanë për qëllim shprehjen e mbështetjes për ish-krerët e UÇK-së dhe mbrojtjen e asaj që organizatorët i konsiderojnë si vlera të luftës çlirimtare.

Tubimet janë paralajmëruar pas vendimit të fundit të Dhomave të Specializuara në Hagë, i cili ka nxitur reagime dhe protesta në Kosovë.

Ndryshe, Gjykata Speciale ka dënuar Hashim Thaçin dhe Jakup Krasniqin me nga 25 vjet burgim, Kadri Veselin me 18 vjet dhe Rexhep Selimin me 13 vjet burgim për krime lufte. Vendimi është apeluar.