Sot takimi me Albin Kurtin, PDK dhe LDK pranojnë ftesën, AAK e refuzon
Kryetari i Lëvizjes Vetëvendosje dhe Kryeministri në detyrë, Albin Kurti, sot pritet të zhvilloj takime me kryetarët e Partisë Demokratike të Kosovës, Bedri Hamza, dhe ,Lidhjes Demokratike të Kosovës, Lumir Abdixhiku, për të diskutuar lidhur me krijimin e institucioneve të reja pas zgjedhjeve të parakohshme, ndërkohë ai i Aleancës për Ardhmërinë e Kosovës, Ardian Gjini, e ka refuzuar ftesën .
Pas mbledhjes së Kryesisë së PDK-së, Bedri Hamza tha se pavarësisht mënyrës se si është dërguar ftesa, partia e tij ka vendosur t’i përgjigjet pozitivisht.
“Unë ia ktheva shkresën që PDK-ja është e gatshme të takohet nesër në ora 9 në ambientet e Kuvendit,” tha Bedri Hamza duke shtuar se për PDK-në prioritet nuk janë ndarjet e posteve, por përmbajtja e marrëveshjes eventuale.
“Unë do të sillem në mënyrë të përgjegjshme dhe institucionale. Nuk jam kundër që të ketë takime, mirëpo para se të flasim për pozitat, e kam thënë dhe e ripërsëris se është tepër e rëndësishme të flasim për prioritetet, vizionin për të ardhmen, programin dhe adresimin e sfidave që i ka Kosova. Nëse nuk ka dakordim për këto, nuk është qëllimi i PDK-së të ketë një numër të caktuar ministrish, një kryetar Kuvendi apo presidentin,” tha Bedri Hamza, Kryetari i PDK-së, parti e sa ka qëndrim të qartë se përgjegjësia për formimin e institucioneve i takon partisë që ka fituar zgjedhjet dhe se pret që Kurti të paraqesë një plan konkret për sigurimin e shumicës parlamentare.
Ndërsa Kryetari i LDK-së, Lumir Abdixhiku, duke konfirmoi se do t’i përgjigjet pozitivisht ftesës, sqaroi:
“Do t’i përgjigjem pozitivisht ftesës. Ky le të jetë një takim i parë. Do të provoj të takohem edhe me liderët e partive të tjera për të kuptuar pozicionet e tyre. Shprehim gatishmëri që LDK të jetë pjesë aktive aq sa mundet, brenda parimeve dhe vlerave që i përfaqëson, drejt formimit të institucioneve të reja,” tha Lumir Abdixhiku.
Pse AAK refuzoi ftesën ndoshta dhe ka habitur të gjithë duke e njohur si parti institucionale, por Kryetari i saj, Ardian Gjini, vendosi ta bëjë publike edhe letrën me të cilën i është drejtuar Albin Kurtit, ku sqaron, sipas tij, pse nuk e sheh të nevojshëm takimin.
“Aleanca është e gatshme pa kushte ose kërkesa vetjake të ndihmojë në bërjen e kuorumit për zgjedhjen e presidentit/es, nëse mandatari për krijimin e Qeverisë i pranon gjashtë pikat e ofertës sonë… Duke e pasur qëndrimin tonë të qartë dhe parimor, nuk e shohim të nevojshëm takimin,” thekson ndër të tjera Ardian Gjini duke përsëritur se mbështetja e AAK për funksionalizimin e institucioneve kushtëzohet me pranimin e gjashtë propozimeve programore, që përfshijnë, mes tjerash, projektin e gazit amerikan, ndërtimin e një termocentrali me thëngjill, rritjen e pragut të TVSH-së për bizneset e vogla, lehtësime për bujqësinë, financimin e projekteve infrastrukturore dhe krijimin e një fondi të posaçëm për Prishtinën.
Ndryshe, ky takim zhvillohet një ditë pasi ka hyrë në fuqi afati kushtetues për konstituimin e Parlamentit. Deputetët e rinj kanë kohë për ta konstituuar legjislaturën e XI-të të Parlamentit të Kosovës deri më 7 gusht.
Duke pasur parasysh se në zgjedhjet e 7 qershorit, LVV mori 53 deputetë, PDK 22, LDK 18 dhe Aleanca, kuptohet se këto takime të thirrura nga Kurti nuk zhvillohen për formimin e qeverisë pasi Vetëvendosje me mandatet e partive të pakicave joserbe ka shumicën e nevojshme me 61 vota, por, iniciativa lidhet me zgjedhjen e Presidentit, arsye kjo që çojë në zgjedhjet e 7 Qershorit, pasi LVV nuk i kishte dhe nuk arrinë ti bëjë as tani 80 votat e nevojshme.
