SPAKISTAN!
nga Agim Popoci
Kur në fillim të këtij viti Kryeministri i Shkodrës, Himarës dhe gjithë Shqipërisë, Edi Rama porositi nga Kongresi i Partisë Socialiste se kjo është Republika e Shqipërisë dhe jo Republika e Prokurorëve, pritej bomba radhës; Siç ndodhë zakonisht pas mesazheve që Rama hedhë nga Kongresi e që shqiptarët e panë nga ai pararendës kur SPAK filloi shkërmoqjen ligjore të Partisë Demokratike deri në arrestimin e liderit të saj, për ti bërë qejfin Kryeministrit dhe për të shtypur atë që minon demokracinë dhe akuzohet nga DASH për korrupsion.
Dhe, meqë e tha shefi i Qet Kastratit e Samir Manes nga tribuna e lartë e partisë ndërkohë SPAK vazhdoi me arrestime të zyrtarëve dhe ish-zyrtarëve socialistë si dhe paralajmërime për arrestime të reja, ai që premtoi se socialistët do vjedhin me stil, Eduard Shalsi, sqaroi se deri ku mund të shkoj SPAK dhe pse nuk do ta bëjë dot Republikën e Prokurorëve sikur gjithë Perëndimin ta ketë në mbështetje dhe jo vetëm Amerikën!
Pra, SPAK mund të vringëllij me pranga për Olta Xhaçkën Ilir Beqjen, Damian Gjiknurin dhe Erion Veliajn, por, edhe Partia Socialiste përveç kufjeve për këtë zhurmë të pakëndshme e bëri të qartë se ka edhe mjete për lojën ku për arbitër është PS, e tellall Shalsi ishte aty që mos të lë ekuivoke:
Komision Parlamentar për të kontrolluar SPAK!
Arsyetimi është shumë më epik se sa ai i vjedhjes së socialistëve me stil, dhe jo siç e bënin demokratët e Saliut dhe komunsitët e Likes:
“Shumë e thjeshtë. Parlamenti do të duhet të modernizohet. Duhet të ngrihet në lartësinë e sfidave të kohës. Do të duhet që të luaj rolin që i beson Kushtetuta!”
Ndoshta është edhe shumë më e thjeshtë se sa e thotë Shalsi! Sot kur Yuri Kim nuk është më, kur Edi Rama e bëri të qartë se SPAK nuk është produkt amerikan por i Partisë Socialiste, edhe Dumani i shkretë me kaq shumë pikëpyetje duhet ta dijë se kë ka shef, pavarësisht se u shpreh që nuk kanë rëndësi emrat, por, prangat!
Kur Edi Rama i kërkoi kreut të SPAK, Altin Dumani, nga Kongresi i vitit të kaluar, arrestimin e Sali Berishës, nuk kishte merakun nëse akuzat e DASH qëndrojnë ose jo, nëse Sailu minoj demokracinë dhe kishte bërë korrupsion, por lideri socialist e donte se s’bënë, me pranga në duar!
“SPAK ka detyrim qe e tejkalon shtetasin e ndaluar familjarisht që të hyjë në SHBA, se ajo deklaratë nuk mund të rrijë aty, ose ka bazë ose jo. Nuk dënohet kush i vrau protestuesit e pafajshëm në bulevard, drejtësia e re ende po vonon, ose po ngurron, nuk e di, që të hyjë në kraterin e vullkanit të padrejtësive, ndërkohë që dënon një zyrtare për një arkë peshk në këmbim të një punësimi të pakryer,” tha Edi Rama e pse Kraja me soj e sorollop të SPAK-ut shkeli të gjitha ligjet e mundshme të drejtësisë së re dhe të vjetër, vetëm për ta parë kreu i qeverisë të arrestuar liderin e opozitës në ndërrimin e moteve, këtë vetëm Altin Dumani e dinë!
Por, Edi Rama nuk ndaloi këtu! Ndonëse SPAK arrestoi Sali Berishën dhe u gjithëpranua nga shpura e prokurorëve se janë në shërbim të Partisë Socialiste, ata u sqaruan se gjithçka mund të bëjnë në këtë vend ku vetëm ligji nuk sundon, por, Republikën e Prokurorëve nuk e bëjnë dot; Dhe, pasi prokurorët u sqaruan se ndryshe i pret Komisioni Parlamentar për kontrollin e SPAK-ut, për bartësin e çmimit “Njeriu i Vitit” nga gazeta revolucionare e Partisë Socialiste, “Koha Jonë”, Altin Dumani, kishte një mesazh balistik nga televizioni i Sandrit, për ti bërë të qartë se nuk është ai kreu i SPAK, siç ishte bindur dhe shitet në opinion! T’fala nuk kishte nga Sandri, por, nga Batoni, ai i cili lëshoi dhe urdhrin e radhës, çfarë do të bëjë kjo Prokurori e Posaçme javën që vjen!
E meqë Edi Rama u zotua se Shqipëria nuk bëhet dot Republikë e Prokurorëve, meqë Shtetet e Bashkuara nuk reaguan kur Kryeministri e mori autorësinë për krijimin e SPAK, dhe SHBA nuk kundërshtoi paralajmërimin për krijimin e Komisionit Parlamentar për kontrollin e kësaj Strukture të Posaçme, kur heq dorë Amerika shqiptarët e panë se çfarë ndodhi me Afganistanin!
Talebanët komunistë tashmë i morën frenat, e qytetarët e dorëzuar se nuk mund ta tundin nga vendi këtë pushtet të Kryeministrit të Shkodrës, Himarës dhe gjithë Shqipërisë ndërsa lideri i opozitës është nën arrest shtëpie, nuk po dinë se çfarë të bëjnë, mund t’ja bëjnë të paktën dhe nderin e fundit të Republikës komuniste të Edi Ramës, pa asnjë kokërr dyshimi, ç’ka qenë, ç’është dhe ç’do të bëhet:
Mirë se vjen SPAKISTAN!
