Spiun i Serbisë, Gjykata në Prishtinë e dënon Hysri Selimin me 6 vjet burg

Gjykata Themelore në Prishtinë ka shpallur fajtor Hysri Selimin dhe e ka dënuar me gjashtë vjet burg për veprën penale të spiunazhit për Agjencinë e Inteligjencës dhe Sigurisë së Serbisë, BIA.

Sipas vendimit të gjykatës, Hysri Selimi u dënua me gjashtë vjet burg, dënim i cili do të ekzekutohet pas plotfuqishmërisë së aktgjykimit. Gjykata gjithashtu e obligoi atë të paguajë 100 euro për paushallin gjyqësor dhe 50 euro për Fondin për Kompensimin e Viktimave të Krimit.

Gjithashtu, gjykata vendosi vazhdimin e masës së paraburgimit ndaj Selimit.

Sipas aktakuzës së ngritur më 9 shtator 2025 nga Prokuroria Speciale e Kosovës, Hysri Selimi akuzohej se nga nëntori i vitit 2009 deri në arrestimin e tij më 6 maj 2025 kishte vepruar si i rekrutuar i Agjencisë së Inteligjencës dhe Sigurisë së Serbisë, BIA, duke mbledhur dhe transmetuar informacione që lidhen me veprimtarinë e ish-pjesëtarëve të UÇK-së, krimet e luftës, personat e radikalizuar dhe pjesëmarrjen e shtetasve shqiptarë në konfliktin në Siri.

Ndryshe, aktgjykimi u shpall sot nga kryetari i trupit gjykues, Leon Përlaska, me anëtarët e trupit gjykues, Medie Bytyqi dhe Kushtrim Shyti.

I akuzuari nuk ishte i pranishëm gjatë shpalljes së aktgjykimit. Në seancën e shpalljes së vendimit morën pjesë prokurori Bekim Kodraliu dhe mbrojtësi i të dënuarit, avokati Ali Beka.