Spiunazh dhe shantazh, Fatmir Sheholli deklarohet i pafajshëm! Prokuroria: Bashkëpunoi me BIA-n
Sot Fatmir Sheholli është deklaruar i pafajshëm ndaj akuzave për spiunazh dhe shantazh, gjatë seancës fillestare të mbajtur në Gjykatë. Mbrojtja ka hequr dorë nga e drejta për të kërkuar hudhjen e aktakuzës dhe kundërshtimin e provave, duke kërkuar që rasti të procedohet sa më shpejt në shqyrtim gjyqësor.
Gjatë seancës fillestare në Gjykatë, Fatmir Sheholli është deklaruar i pafajshëm ndaj akuzave për spiunazh dhe shantazh.
“E ndjej veten plotësisht të pafajshëm për dy veprat penale të ngarkuara në aktakuzë,” tha Sheholli para trupit gjykues.
Në anën tjetër, mbrojtja ka hequr dorë nga e drejta për të kërkuar hudhjen e aktakuzës dhe kundërshtimin e provave, duke kërkuar që çështja të procedohet sa më shpejt drejt shqyrtimit gjyqësor.
Avokati mbrojtës Mentor Neziri ka deklaruar se mbrojtja dëshiron që procesi gjyqësor të nisë pa shfrytëzuar afatin 30 ditor për paraqitjen e kundërshtimeve ndaj aktakuzës dhe provave.
“Ne tërhiqemi nga e drejta e hudhjes së aktakuzës. Dëshirojmë të fillojmë menjëherë me shqyrtimin gjyqësor, posa Gjykata ta ketë mundësinë që ta shqyrtojë këtë seancë,” tha Neziri.
Edhe Sheholli është shprehur se heq dorë nga e drejta për të kërkuar hudhjen e aktakuzës dhe për të kundërshtuar provat e përfshira në të.
Gjykata i ka njoftuar palët se, meqë rasti do të vazhdojë në shqyrtim gjyqësor, çështja do të trajtohet nga një trup gjykues. Sipas Gjykatës, anëtarët e trupit gjykues caktohen përmes sistemit automatik dhe, për këtë arsye, aktualisht nuk mund të caktohet menjëherë data e seancës së shqyrtimit gjyqësor.
Palët do të njoftohen me kohë për datën dhe orën e seancës, pasi të përfundojnë procedurat përkatëse.
Prokuroria: Sheholli bashkëpunoi me BIA-n
Në seancë, Prokuroria ka lexuar aktakuzën ndaj Fatmir Shehollit, i cili akuzohet për veprat penale të spiunazhit dhe shantazhit.
Sipas prokurorit Bekim Kodraliu, Sheholli dyshohet se ka ndihmuar veprimtarinë e Shërbimit Informativ të Serbisë, BIA, duke mbledhur dhe përcjellë informacione lidhur me aktivitetet politike, gjendjen e sigurisë dhe funksionimin e institucioneve të Kosovës.
Prokuroria pretendon se Sheholli, nga një datë e papërcaktuar deri më 9 tetor 2025, ka vepruar në bazë të urdhrave dhe detyrave të një zyrtari të lartë të BIA-s, të identifikuar në aktakuzë si Bojan Dimiç.
Sipas aktakuzës, ai dyshohet se ka mbledhur, siguruar dhe përcjellë përmes komunikimeve dhe mesazheve telefonike të dhëna, informacione dhe dokumente që lidhen me aktivitetet politike, gjendjen e sigurisë dhe funksionimin e institucioneve të Kosovës.
Prokuroria pretendon gjithashtu se, në kuadër të këtyre aktiviteteve, Sheholli ka zbatuar një plan operativ që synonte, sipas aktakuzës, dëmtimin e interesave të Kosovës dhe ndërhyrjen në procesin zgjedhor të 12 tetorit 2025.
Në aktakuzë thuhet se më 26 shtator 2025, Sheholli kishte udhëtuar në Mitrovicën e Veriut, ku dyshohet se ka pranuar materiale audio dhe transkripte të bisedave të disa zyrtarëve të lartë të Ministrisë për Komunitete dhe Kthim, si dhe shumën prej 5 mijë eurosh.
Sipas prokurorisë, këto materiale më pas i janë dorëzuar gazetarit Milaim Zeka, së bashku me 1 mijë euro, me udhëzime për mënyrën dhe kohën e publikimit të tyre në emisionin “Pa Rrotlla”.
Prokuroria pretendon se këto veprime kanë pasur për qëllim diskreditimin e institucioneve dhe zyrtarëve të Kosovës, thellimin e përçarjeve shoqërore dhe ndërhyrjen e një shërbimi të huaj informativ në procesin zgjedhor.
Akuzë edhe për shantazh
Përveç spiunazhit, Sheholli akuzohet edhe për shantazh ndaj Arben Jetullahut, pronar i një biznesi në Kosovë.
Sipas Prokurorisë, gjatë periudhës nga viti 2022 deri në dhjetor 2025, Sheholli dyshohet se ka kërkuar para nga Jetullahu, duke e kërcënuar me publikimin e video-incizimeve dhe informacioneve që, sipas aktakuzës, do t’i dëmtonin nderin, reputacionin dhe autoritetin.
Prokuroria pretendon se shuma e kërkuar ka tejkaluar 13 mijë euro, ndërsa një pjesë e pagesave dyshohet se është bërë edhe gjatë kohës kur Sheholli ndodhej në paraburgim.
Në aktakuzë thuhet se përmes një familjari të tij, Sheholli dyshohet t’i ketë dërguar të dëmtuarit mesazhe kërcënuese, duke i kërkuar pagesë mujore prej 700 eurosh dhe duke e paralajmëruar për publikimin e një video-incizimi.
Sipas Prokurorisë, si pasojë e këtyre kërcënimeve, një punëtor i të dëmtuarit i ka dorëzuar familjarit të Shehollit shumën prej 5 mijë eurosh.
Prokuroria thotë se pretendimet për shantazh janë mbështetur edhe në rezultatet e masave të veçanta hetimore, përmes të cilave janë siguruar komunikime dhe porosi që, sipas saj, përmbajnë kërcënime ndaj të dëmtuarit.
Fatmir Sheholli i ka mohuar akuzat, ndërsa çështja tani pritet të vazhdojë në shqyrtim gjyqësor, ku palët do të paraqesin provat dhe argumentet e tyre.
Gjykatësi i rastit, Avni Syla, e mbylli seancën e sotme duke thënë se sapo të caktohet trupi gjyqësor për këtë rast do të njoftohen palët për caktimin e seancës së radhës.
