Stoltenberg: Nuk mund ta marrim paqen dhe sigurinë si të garantuar

Sekretari i Përgjithshëm i NATO-s, Jens Stoltenberg, tha sot se lufta e presidentit rus, Vladimir Putin ka shkundur paqen dhe ka shokuar botën.

Shefi i NATO-s pas takimit me kancelarin gjerman, Olaf Scholz në Berlin ka lavdëruar forcat e Kievit dhe është zotuar se do të vazhdojë mbështetja për to, në mënyrë që të shfrytëzojnë të drejtën për vetëmbrojtje, siç e parashikon Karta e Kombeve të Bashkuara.

Stoltenberg me këtë rast ka falënderuar Gjermaninë për mbështetjen ushtarake dhe atë humanitare për Ukrainën duke shtuar se “NATO-ja ka përgjegjësi për të parandaluar këtë luftë nga përshkallëzimi i mëtejmë”, si dhe ka paralajmëruar vendet anëtare të bllokut të sigurisë se “ne nuk mund të marrim si të garantuar paqen dhe sigurinë”.

“Dje, ministrat e Mbrojtjes kanë nisur të shqyrtojnë se çfarë duhet të bëjmë për të rritur mbrojtjen tonë në periudhë afatgjatë. Kjo gjë do të kërkojë rritje të madhe të investimeve në mbrojtje,” tha Stoltenberg.

Ndërkohë, Scholz tha se Gjermania ka rritur fondet për forcat e armatosura të saj, për të siguruar se NATO është e gatshme të përmbushë detyrat dhe mandatin që ka.

Ndryshe, më shumë se tre milionë njerëz kanë ikur nga Ukraina, prej kur presidenti rus, Vladimir Putin, urdhëroi pushtimin e Ukrainës më 24 shkurt. Putin ka urdhëruar “operacion special” për të çmilitarizuar Ukrainën. Veprimi i Kremlinit ka nxitur zemërim dhe është dënuar në shumë vende të botës. Shtetet e Bashkuara dhe aleatët janë përgjigjur me sanksione të ashpra kundër Moskës./RFE/