Studentët çojnë në Gjykatën Kushtetuese tre Akte të qeverisë që ndalojnë protestën: Të pezullohet zbatimi!

Studentët protestues kanë ankimuar sot në Gjykatën Kushtetuese tre Akte Normative të qeverisë, që i pengon ata të grumbullohen dhe të protestojnë.

Studentët e grupimeve “Studentët n’ Protestë” dhe “Revolucioni Studentor”, pasi bënë me dije se kanë depozituar në Gjykatën Kushtetuese tre ankimet firmosura së bashku me katër organizata të shoqërisë civile, Qendrën Res Publica, Komitetin Shqiptar të Helsinkit, Shoqatën Ornitologjike të Shqipërisë dhe EcoAlbania, kërkojnë nga Kushtetuesja që të pezullohet zbatimi i dispozitës.

“Tre Akte të ndryshme, me një mesazh të përbashkët: kush ngre zërin kundër pushtetit, duhet të ketë frikë nga pasojat. Qeveria thotë se me këtë paketë ‘protesta paqësore mbrohet’ dhe se ‘përgjegjësia është gjithnjë vetjake’, paketa ‘antidhunë’ ndëshkon edhe ata që nuk kanë ushtruar dhunë,” tha njëri prej studentëve duke fol në emër të studentëve protestues.

“Për këtë arsye, kërkojmë që Gjykata Kushtetuese t’i shqyrtojë ankimet me përparësi. I kërkojmë gjithashtu që, deri në vendimin përfundimtar, të pezullojë zbatimin e dispozitave për të cilat kemi kërkuar pezullim. Edhe nëse Kuvendi i miraton Aktet Normative, ankimet nuk mbeten pa objekt, i kemi kërkuar Gjykatës ta shtrijë kontrollin edhe te ligji miratues,” shprehet njëra prej studenteve duke argumentuar se të protestosh nuk është faj dhe se ata që protestojnë nuk mund të trajtohen si armiq ndërsa përfundoi:

“Një brez i tërë të rinjsh po e nis jetën përballë një shteti që, në vend që t’u garantojë hapësirë për debat, kundërshtim e pjesëmarrje demokratike, u përgjigjet me dhunë e frikë. Nuk duam të rritemi duke mësuar se të kundërshtosh pushtetin është faj dhe se pjesëmarrja në protestë është arsye për t’u trajtuar si armik.”