Stuhi dhe reshje bore, ARRSH: Drejtuesit e mjeteve të pajisen me zinxhirë në akset…
Reshjet e borës dhe stuhia raportohet se kanë shkaktuar probleme në veri të vendit si në Valbonë, Kukës dhe Pukë ndërsa në juglindje në Ersekë, Dardhë dhe Voskopojë, Autoriteti Rrugor Shqiptar, ARRSH, raporton se qarkullimi vijon pa probleme në të gjitha akset nacionale ndërsa tregon dhe akset ku janë të domsodshëm zinxhirët.
“Gjatë natës dhe në orët e para të mëngjesit ka pasur reshje dëbore në akset Bilisht-Kapshticë, Qafë Qarri-Ersekë, në Dardhë, në Voskopojë, Zëmblak-Dogana Goricë, Pukë-Fushë Arrëz, Qafë Mali-Kukës dhe në Valbonë. Temperaturat kanë qenë në vlera negative deri në -3 °C,” thekson Autoriteti Rrugor Shqiptar duke shtuar se mjetet borëpastruese kanë punuar për pastrimin e borës dhe shpërndarjen e kripës pa ndërprerje.
“Qarkullimi vijon pa probleme në të gjitha akset nacionale. Drejtuesit e mjeteve të pajisen me goma dimërore dhe zinxhirë kur udhëtojnë për në segmentet e mësipërme që janë me prezencë dëbore,” shprehet Autoriteti Rrugor Shqiptar duke rekomanduar drejturesve të mjeteve të ulin shpejtësinë, të respektojnë sinjalistikën dhe udhëzimet e Policisë Rrugore.
