Sulmet e Ramës dhe Ruçit ndaj deputetëve holandezë/ Si duket kemi shkelur tek diçka e ndjeshme…
“De Telegraaf”, gazeta më e madhe në Holandë, i ka kushtuar një shkrim deklaratave të Kryeministrit Edi Rama dhe Kryetarit të Kuvendit Gramoz Ruçi, të cilët ironizuan vizitën e deputetëve holandezë në Shqipëri, në kuadër të një misioni faktmbledhës në prag të vendimit për hapjen e negociatave.
Shkrimi shpreh çudinë se si Kryetari i Kuvendit ka kritikuar Holandën, duke folur për rezultatet e fundit në Eurovizion dhe fushën e futbollit.
Shkrimi vazhdon duke përshkruar se si deputetët holandezë kanë shprehur shqetesim për ndryshimet e fundit në prokurori, në lidhje me çështjen e ish-ministrit Tahiri, si dhe përshkrimi i mediave shqiptare për mosekstradimin e vëllait të ministrit Xhafaj.
Kryetari i delegacionit të grupit parlamentar holandez Malik Azmani, tha për ‘De Telegraaf”: “si duket kemi shkelur tek diçka e ndjeshme në Shqipëri duke ngritur pyetjet tona, ne i dëgjojmë ata.”
Ja çfarë tha Rama për deputetët holandezë
Më vjen për të qeshur kur vijnë delegacione me fakt fajding (fact finding). Vijnë në mëngjes e ikin pasdite për të mbledhur fakte. Më takojnë mua, ca deputetë, takojnë dhe mikun tim të shtrenjtë me të cilin na bashkon, sigurisht në rrugë të ndryshme dashuria për Holandën, Lulzim Bashën, dhe largohen dhe mbledhin fakte. Çfarë lloj faktesh mund të mblidhen brenda gjysmë dite, ndërkohë KE është një ushtri ekspertësh dhe burokratësh të panumërt që hanë fakte, pijnë fakte, flasin fakte, dhe dëgjojnë vetëm fakte.
Ja çfarë tha Ruçi për deputetët holandezë
Nëse një deputet përmend një qytetar shqiptar që ka kryer një akt kriminal në Holandë unë do t’i thosha që ka me dhjetëra qytetarë që në fusha janë simbol edhe për BE edhe për holandezët. Besoj nuk ka tre holandezë që konkurojnë ne Eurovizion, por tre shqiptarë ka. Kjo është një kartë pozitive dhe tre shqiptarë përefaqësojnë Shqipërinë, Italinë dhe Qipron. Shembulli i Tares në Itali është i kërkuar në të gjitha vendet që luhet futboll si drejtori më i suksesshëm sportiv.
Ndonjëri mund të më quajë nostalgjik mua, meqë vij nga sistemi i kaluar. Në atë sistem nuk kishte as drogë, as korrupsion, as prostitucion dhe as kriminalitet. Ne bëmë zgjedhjen tonë, ose të rrëzonim diktaturën dhe Shqipërinë ta hapnim, siç u hap ose duhet të mbanim diktaturën dhe të qëndronim mbyllur pa këto fenomene.
Dhe të gjitha këto fenomene nuk i çuan shqiptarët në Europë, por i gjetën mes europianëve. Dhe gjithë kjo betejë ose kjo luftë duhet fituar bashkërisht. Se do të vazhdoja t’i thoja kolegut holandez që nëse është njollë e zezë mbjellja e hashashit, e vetmja në Shqipëri, fara vjen nga Holanda, teknologjia është në Holandë, tregu është në Holandë se është e ligjëruar dhe unë nuk akuzoj Holandën që është vendi i BE, por kam të drejtën të mos më identifikojnë mua si vend me këto, por të më vlerësojë për përpjekjet që unë bëj dhe rezultatet e arritura si rezultat i zbatimit të ligjit deri tek vetingu për ta përvëluar këtë fenomen negativ për vendin tone.
