Sulmi në Banjskë, dy të akuzuarit me burgim të përjetshëm, njëri 30 vjet
Gjykata Themelore e Prishtinës ka shpallur fajtor, tre serb në rastin e sulmit në Banjskë, duke i shqiptuar dënimin me burgim të përjetshëm dy të akuzuarve, Vladimir Toliç dhe Blagoje Spasojeviç, ndërsa Dushan Maksimoviç u dënua me 30 vjet burgim.
Shpalljen e aktgjykimit e ka bërë Kryetari i trupit gjykues, Ngadhnjim Arrni, në përbërje me anëtarët Rrahman Beqiri dhe Donikë Shala Abdyli.
Prokuroria në fjalën përfundimtare ka kërkuar burgim të përjetshëm për Spasojeviçin, Toliçin e Maksimoviçin. Ata janë në mesin e 42 personave të akuzuar për këtë rast.
Gjate fjalës së tij prokurori Naim Abazi tha se ekzistojnë prova të qarta se grupi terrorist ka qenë mirë i organizuar, qe nga viti 2021 ne Rashkë, me qëllim të prishjes së rendit e qetësisë dhe me qëllim të shkëputjes së një pjese të territorit të Republikës së Kosovës.
Prokurori ka argumentuar edhe me video e fotografi pjesëmarrjen dhe përfshirjen e secilit të akuzuar, në sulmin terrorist në Banjska ku u vra rreshteri, Afrim Bunjaku. Burgim të përjetshëm ka kërkuar edhe avokati i familjes Bunjaku, Arianit Koci.
Pas shpalljes së aktgjykimit, prokurori special, Naim Abazi, tha se vendimi është i mangët, pasi në të nuk është përfshirë edhe pjesa tjetër e të akuzuarve, përfshirë edhe Milan Radoiçiç, por shtoi se Prokuroria po bën të gjitha përpjekjet që ata të sillen para drejtësisë.
Duke e vlerësuar si rastin më kompleks në Kosovë, Naim Abazi tha se vendimi i sotëm është mesazh për këdo që tenton të kryejë vepra të tilla se do të përballen me dënim të merituar.
I pyetur se si synon Prokuroria Speciale të sjellë para drejtësisë të akuzuarin kryesor, Milan Radoiçiç, prokurori Abazi tha se do të shfrytëzohen mekanizmat ndërkombëtarë, sikurse Interpoli.
Ndryshe,më 24 shtator 2023 një grup i armatosur serbësh me armatim të rëndë me në krye Milan Radoiçiçin, fillimisht bllokoi urën në fshatin Banjskë të Zveçanit, e më pas sulmoi policët që shkuan në vendngjarje për ta hequr kamionin nga rruga.
Gjatë sulmit të serbëve të armatosur u vra rreshteri Afrim Bunjaku dhe u plagosën dy policë të tjerë. Sipas aktakuzës së Prokurorisë Speciale, synimi i sulmuesve ishte që ta ndanin veriun nga Kosova.
