Tajani: Italia me vizion strategjik për Ballkanin

Zv/Kryeministri dhe ministri i Punëve të Jashtme i Italisë, Antonio Tajani, ka pritur në Romë grupin “Miqtë e Ballkanit Perëndimor”, ku është miratuar dhe “Karta e Romës”, dokument politik ky që Qeveria italiane do ta paraqesë në Bruksel.

“Ne miratuam ‘Kartën e Romës’, një dokument politik të Qeverisë italiane, të cilin do ta prezantojmë në Bruksel: barazinë e shteteve anëtare pas anëtarësimit, mungesën e kërkesave të reja apo kushtëzimeve për qasje, si dhe përcaktimin e një kuadri të përbashkët të përshtatur për secilin vend kandidat,” u shpreh shefi i diplomacisë italiane përmes rrjetit social X duke saktësuar se po punohet për të forcuar infrastrukturën e transportit, rrjetet energjetike dhe lidhjen digjitale, nga IMEC deri te Korridori VIII, si dhe për sigurinë ushqimore, ndërsa përfundoi:

“Jemi të bindur për nevojën që t’i jepet përparësi politike ribashkimit të familjes evropiane me Ballkanin. Italia synon ta udhëheqë këtë proces, me një vizion strategjik të qartë dhe të vendosur!”