Takim me ambasadorët, Kurti: Pas 16 shtatorit, stabilitet institucional!

Situata aktuale, nevoja për stabilitet institucional pas rrethanave të krijuara pas 16 shtatorit, ishin temë e dsikutimeve që Kryeministri i Kosovës, Albin Kurti, zhvilloi në takim me të Ngarkuarën me Punë të Ambasadës së Shteteve të Bashkuara, Anu Prattipati, ambasadorin e Mbretërisë së Bashkuar, Jonathan Hargreaves, si dhe ambasadorin e Republikës Federale të Gjermanisë, Rainer Rudolph.

“Krahas bisedave për marrëdhëniet e mira dypalëshe me secilin prej vendeve që përfaqësojnë dhe mundësive të avancimit të mëtejmë, sikurse për përparimin demokratik, zhvillimin e qëndrueshëm ekonomik dhe proceset integruese të Kosovës, diskutuam edhe për temat aktuale, me theks nevojën për stabilitet institucional, posaçërisht në rrethanat e krijuara pas 16 shtatorit,” u shprej Albin Kurti pas takimit përmes rrjetit social ku dhe pranoi urime për Qeverinë dhe mandatin e ri ndërsa përfundoi:

“Republika e Kosovës është gjithmonë falënderuese dhe përherë mirënjohëse për mbështetjen e vazhdueshme dhe të palëkundur të SHBA-së, Mbretërisë së Bashkuar dhe Gjermanisë.”