Takim me Viola Amherd, Kurti: Mirënjohje Zvicrës, për kontributin e dhënë për Kosovën

Mirënjohje të thellë Zvicrës për kontributin e dhënë për Kosovën dhe për ndihmën e vazhdueshme në programet e zhvillimit të ekonomisë dhe demokracisë, ka shprehur Kryeministri Albin Kurti, në takim me Zv/Presidenten zvicerane Viola Amherd dhe Ministrin e Ekonomisë, Guy Parmelin, në takimin i cili u zhvillua në kuadër të Forumit Ekonomik Botëror që po mbahet në Davos.

Në këtë takim, Albin Kurti theksoi dhe rëndësinë e mërgatës shqiptare në Zvicër, që, siç tha Kryeministri i Kosovës, janë urë lidhëse mes dy shteteve dhe kontribuojnë në ekonominë e të dyja vendeve.

“U bisedua për mundësitë për më shumë bashkëpunim në ekonomi dhe mbrojtje. Me theks të veçantë u bisedua edhe për shkëmbim të përvojave në teknologji të informacionit dhe edukim,” tha Kryeministri Albin Kurti pas takimit.

Në fund, Kryeministri Albin Kurti ritheksoi përkushtimin e Qeverisë së Kosovës për reforma strukturore në ekonomi, politikë, sundim të ligjit dhe demokraci funksionale në përputhje me standardet evropiane.