Taksa në Rrugën e Kombit, Basha në Kukës: Ditën e parë kam për ta hequr!

Kryetari i Partisë Demokratike, Lulzim Basha, në vijim të turit të takimeve me qytetarët “#PotëDëgjoj”, premtoi në Kukës se në ditën e parë të ardhjes në pushtet do të heqë taksen e vendosur nga Edi Rama në Rrugën e Kombit.

“Do të ringremë ekonominë dhe do të zhdukim fenomenin e largimit të rinisë. Zhvillimi i ekonomisë i jep zgjidhje njëherë e përgjithmonë largimit të shqiptarëve,” tha Lulzim Basha duke dhënë premtimin e shumëpritur për banorët e Qarkut të Kukësit dhe Kosovës:

“Ditën e parë qeveria jonë do të heqë taksën në Rrugën e Kombit!”

Në bashkëbisedim me familjet kuksiane, Basha ka dëgjuar ankesa të shumta për gjendjen ekonomike, që ka detyruar të rinjtë të marrin rrugën e mërgimit.

“Edhe babën e këtyre kemi për ta kthyer, por ka për t’u kthyer vetë, edhe këta fëmijë ta ndërtojnë jetën këtu,” tha Basha duke shtuar se gjërat e mira që janë bërë nuk duhet të harrohen, që nga Rruga e Kombit te dyfishimi i rrogave të mësuesve, te ecja përpara e biznesit në atë kohë.

“Kukësi dhe familjet kuksiane po lëngojnë nga dhimbja e largimit të të rinjve me energji dhe talent, për shkak të mungesës së punësimit dhe arsimit. Sa më parë duhet të çlirohemi nga kjo braktisje, nga kjo e keqe! Fuqizimi i ekonomisë është prioritet i programit tonë dhe zgjidhje për plagën e emigracionit. E ardhmja u takon të rinjve!”

Ndërkohë për zhdukjen e fenomenit të largimit të rinisë ai shtoi:

“Kur këto pasuritë e Kukësit t’i vendosim të punojnë për kuksianët, autobusët do të mbushen Bruksel-Kukës e jo Kukës-Bruksel,” tha Kryetari I Partisë Demokratike ndërsa përfundoi:

 “Varfëria po e bën Kukësin dhe Shqipërinë të pajetueshme për qytetarët dhe të pashpresë për të rinjtë. Do të ringremë ekonominë dhe do të zhdukim fenomenin e largimit të rinisë. Zhvillimi i ekonomisë i jep zgjidhje një herë e përgjithmonë largimit të shqiptareve.”