Taksa për eksportet e çelikut, Merkel: Nëse SHBA i vendos, përgjigjia do jetë e unifikuar

“Bashkimi Europian do të kundërpërgjigjet në mënyrë të vendosur dhe të unifikuar nëse SHBA-ja vendos taksa për eksportet e çelikut dhe aluminit”, theksoi kancelarja gjermane, Angela Merkel, gjatë një  vizite në Lisbonë.

Tarifat synojnë që industritë amerikane të rrisin normën e shfrytëzimit të kapacitetit në mbi 80%, për të parën herë ndër vite.

Kancelarja gjermane tha se anëtarët e Bashkimit Europian kanë rënë dakord të kundërpërgjigjen në mënyrë inteligjente, të vendosur dhe të bashkuar.

“Sanksionet e studiuara nga presidenti amerikan, Donald Trump nuk janë konform rregullave të Organizatës Botërore të Tregtisë”, nënvizoi ajo.

Uashingtoni lajmëroi planet për të vendosur tarifa në importet e çelikut dhe aluminit nga Europa,  ndërsa sekretari i Tregtisë tha se përkeqësimi i përplasjes tregtare do të varet nga reagimi i Bashkimit Europian.

Sipas burimeve për Reuters, vendimi mund të vijë më datë 1 Qershor, kur skadon edhe përjashtimi i bllokut nga tarifat e planifikuara.

Sekretari i Tregtisë, Wilbur Ross, pa konfirmuar në mënyrë direkte se SHBA do të vendosë tarifat, tha se i takon Bashkimit Europian që të vendosë nëse do të kundërpërgjigjet.

Ai shtoi se Shtetet e Bashkuara do të reagojnë në të njëjtën mënyrë që bënë me Kinën, kur kërcënoi se do të kundërpërgjigjet.

Ministri i Financave në Francë, Bruno Le Maire, tha se Bashkimi Europian nuk synon luftë tregtare, por që do të kundërpërgjigjet nëse Uashingtoni vendos tarifat.

Komisioni Europian që koordinon politikat tregtare për 28 vendet anëtare, ka bërë të ditur se blloku duhet të përjashtohet në mënyrë të përhershme nga tarifat, ndërkohë që nuk është shkaku i mbikapacitetit për metalet.