Të pafytyrët!

nga Agim Popoci

Nuk janë të pafytyrë pse votojnë agjent të SHIK-ut në Autoritetin për të Drejtën e Informimit mbi Dokumentet e Ish Sigurimit të Shtetit, as kur votojnë zv/ministrat e Edi Ramës, madje as kur degdisin pjesëtarët e Familjes Miraka 960 vjet në burgje dhe internime, por janë të pafytyrë kur votojnë njërin prej anëtarëve të kësaj familje, Simon Mirakajn, si anëtar të këtij Autoriteti!

Dhe, këtë e konstaton në Komisionin për Çështjet Ligjore, Administratën Publike dhe të Drejtat e Njeriut, Sekretari i Përgjithshëm i Lulzim Bashës, i cili me grupin e tij, ditë më parë kërkonte edhe president antikomunist, dhe sot Simon Mirakajn  do ta zëvendësoj me njerëz me të kaluar të dyshimtë që krekosen ndër të përndjekurit politik!

Shkencëtari i madh Albert Einstein thotë se “njerëzimi nuk kërcënohet nga njerëzit që bëjnë keq, por nga ata që i lejojnë të bëjnë keq”!

Po çfarë duhet bërë kësaj race e cila që në momentin kur blindoj Partinë Demokratike dhe me gjoksin e policisë së Edi Ramës iu kundërvu atyre që në PD mendojnë ndryshe, nuk u ndalua dhe sot i bënë karshillëk të gjithë atyre demokratëve që edhe me votë i thanë se nuk i duan!

Ka prej atyre që mendojnë se sot është vonë, ky grup kriminal i demokratëve të Lulzim Bashës është nën kujdesin e Kryeministrit Edi Rama i cili tashmë ka dhe drejtësinë në dorë, por ky terror shtetëror që ushtron Bardhi me shokë përmes levave shtetërore, në asnjë mënyrë nuk mund të ketë jetë të gjatë.

Nëse komunistët nuk e votojnë Simon Mirakajn në Autoritetin për të Drejtën e Informimit mbi Dokumentet e Ish Sigurimit të Shtetit, kjo si për zotin Simon ashtu dhe shtresën e tij nuk është ndonjë risi, por nëse i ka shkuar nëpër mend Lulzim Bashës ose larg qoftë morrit të tij, Gazment Bardhi, se nëse nuk janë me ata nuk do të votohen në këtë Autoritet, atëherë gabohen rëndë!

Autoriteti për të Drejtën e Informimit mbi Dokumentet e Ish Sigurimit të Shtetit është themeluar para pesë viteve dhe është fakt se nuk u bë me kërkesën e asnjërës palë në politikë, as Lulzim Bashës dhe aq më pak Edi Ramës, por ndërkombëtarëve që gjykuan se me hapjen e dosjeve do të qetësohen shumë shpirtra në këtë vend të përmbytur në gjak nga komunistët.

Por, gjithashtu, është fakt, se deputetët e Lulzim Bashës edhe pse kanë kaluar pesë vjet, ende nuk e kanë marrë vërtetimin e pastërtisë së figurës. Pse nuk e kanë bërë këtë verifikim ky grupim që kërkuan dhe presidentin antikomunist ende nuk dihet, por pse e pengon Bashën dhe Bardhin një i përndjekur në këtë Autoritet dhe jo tre komunistë, kjo vetëm sot është e qartë; Ashtu siç është e qartë se kush është sot i pafytyri në këtë mes!

Sot, sepse Kryetari i Grupit Parlamentar të Partisë Socialiste, Taulant Balla, dhe soji i tijë nuk kanë nevojë të thonë se nuk mund ta votojnë Simon Mirakajn pasi kanë “konstatuar se ndër deputetët që kanë propozuar kandidaturën e tij është përfshirë katrani me bojë dhe si i tillë e ka bërë pis emrin e tij,” dhe i kërkojnë zotit Miraka që nëse vjen në një listë të re pa atë do ta konsiderojnë; Dhe, sipas kësaj partie kriminale, është në nderin e zotit Miraka që mos ta bëjë pis emrin e vetë që një propozues është njësoj si sigurimi i shtetit. “Edhe firmëtari i zotit Miraka këto të dyja ka si Sigurimi i Shtetit. Ne po ndihmojmë zotin Miraka që të mos bëhet pis.”

Sepse, është kjo parti e Taulantit e cila jo familjen Miraka por gjithë Mirditën e terrorizuan gurë më gurë, aty ku flinte dhe pinte ujë Gjon Marka Gjoni ndërsa shqiptarëve u kërkonte, Armën ose Shpirtin!

Sigurimin e Shtetit, ky i pafytyrë le t’ia tregoj Gazment Bardhit i cili ka hallin me të vrarët në fushatën e Elbasanit, ose shefit të tij me Toyota Yaris dhe 3.2 milionë euro, dhe jo një të përndjekuri 80 vjeçar që mbledhë 28 firma deputetësh demokratë, që Bardhi me Bashën nuk po i mbledhin dot në grup që nga zgjedhjet e 5 marsit 2022.  

Sigurimin e Shtetit, ky i pafytyrë le t’ia tregoj atyre që shkojnë në Haxh dhe nuk e dinë pse, ose dhe atyre që kriminelët u paguajnë biletat të shikojnë finalen e kampionëve evropian të futbollit në Stamboll, pa e ditur se kush është miku-donator!

Në fund, Sigurimin e Shtetit le të vazhdoj t’ia tregoj atyre që i ka punësuar në Autoritet dhe u dikton se cilat dosje duhet të shërbehen e cilat jo!

Demokratët tashmë e kanë ndarë mendjen se si do ta ridemonsionojnë politikën e tyre, për ti trajtuar këta kriminelë të pashpirt, ndryshe nga ditët e para të pluralizmit, kur e kishin parasysh ashtu si dhe Jean Reno: “Të gjithë njerëzit negativ, prepotent, dashakeq, të pandjeshëm, të pamëshirshëm dhe të pafytyrë janë vetëm fatkeq!” Thjeshtë, kjo vlenë edhe sot, por, për njerëzit, dhe jo komunistët!