Thaçi mburret se ka takuar Medvedevin. Edi Rama e takon por…

Presidenti i Kosovës, Hashim Thaçi, mburret se në kuadër të ceremonisë së inaugurimit të presidentit turk, Rexhep Tayyip Erdogan, ka takuar Kryeministrin e Rusisë, Dmitry Medvedev; Ndërkohë disa media në Shqipëri raportojnë se një takim të tillë e ka realizuar edhe Edi Rama ndonëse ky i fundit nuk nxitoi ta publikoi takimin aty ku jeton dhe punon, në rrjetin social Facebook.

Presidenti Thaçi në profilin e tij në Facebook ka shkruar se kryeministrin Medvedev shkurtimisht e ka informuar për zhvillimet në Kosovë dhe në rajon.

“Me këtë rast, kërkova nga kryeministri Medvedev që të vendosim një komunikim fillestar midis dy vendeve tona. Ne po ashtu biseduam edhe për fazën e fundit të normalizimit të marrëdhënieve ndërmjet Kosovës dhe Serbisë, dhe u pajtuam se marrëveshja eventuale do të sjell paqe afatgjatë në Ballkanin Perëndimor”, ka shkruar Thaçi.

Ky është takimi më i lartë ndërmjet dy përfaqësuesve shtetëror në historinë e marrëdhënieve ndërmjet dy shteteve.