Tragjedia në Athinë/ Turqia i ofron ndihmë Greqisë, por…

Turqia i ka ofruar ndihmë Greqisë për përballimin e situatës së jashtëzakonshme të krijuar në zonën e Atikas, në periferi të Athinës, si pasojë e zjarreve që shkaktuan rreth 60 viktima dhe mbi 160 të plagosur.

Turqia ka shprehur gadishmërinë të dërgojë avionë zjarrfikës në Greqinë fqinje. Ministri i Jashtëm turk tha se aeroplanë dhe helikopterë turq janë në gatishmëri për të ndihmuar Greqinë.

Mevlut Cavusoglu tha se homologu i tij grek Nikos Kotzias e falënderoi atë për ofertën, por tha se asistenca nuk nevojitej aktualisht.

Bekir Pakdemirli, ministri i bujqësisë dhe pylltarisë së Turqisë, në Ankara tha se aeroplanët janë 45 minuta larg nëse ka një kërkesë dhe jemi gati të ndërhyjmë menjëherë.

Presidenti Rexhep Tajip Erdogan gjithashtu shprehu ngushëllimet e tij dhe tha se vendi i tij ishte gati të ndihmonte.