Turi ballkanik/ Albin Kurti refuzon të takohet me Edi Ramën, ky heshtë!

Kryeministri i Shqipërisë, Edi Rama, niset nesër në turin ballkanik, por, që në stacionin e parë do të takohet me vetëveten. Kryeministri i Kosovës, Albin Kurti, sot tha i prerë se nuk do të takohet me Kryeministrin Rama pa mbajtjen e mbledhjes së përbashkët të dy qeverive ndërsa Edi Rama refuzoi ta komentoi në Tiranë këtë vendim të homologut kosovar.

“I kërkova të mbajmë mbledhjen e qeverisë që u anulua. Do rrijë 2 ditë dhe 1 natë në Prishtinë në kuadër të Procesit të Berlinit. I kërkova të bënim mbledhje qeverie për të firmosur marrëveshjet. Nuk e takoj nëse nuk do jetë mbledhje e përbashkët e qeverive që u anulua,” ishte i qartë sot Albin Kurti por jo dhe homologu i tij nga Tirana i cili në një dalje publike jo vetëm që refuzoi të komentoi deklaratën e Kurtit por u largua fare.

“Sa i përket vajtjes nesër në Prishtinë dhe turit, do të flasë kur është koha për të folur që është, nesër në Prishtinë!” tha Kryeministri Edi Rama dhe u largua nga konferenca për shtyp pasi u bezdis edhe nga pyetja që i bënë për Ballkanin e Hapur.

Ndryshe, mbledhja e përbashkët e dy qeverive që ishte parashikuar të mbahet në Gjakovë, ishte sanksioni i parë që iu vu Kosovës e cila nga BE fajësohet për tensionimin e situatës në veri. Dhe, ky sanksion nuk iu vu nga BE por nga Kryeministri i Shqipërisë, Edi Rama, vendim i cili edhe sot përdoret si referncë për të akuzuar Albin Kurtin dhe qeverinë e tij!

Ndërkohë Kryeministri Edi Rama për nesër ka paralajmëruar se do të nis turin e tij ballkanik në përpjekje për të përgatitur takimin e radhës së së Procesit të Berlinit, i cili pritet të mbahet në muajin tetor në Tiranë.