Udhëzimi për Arsimin: Drejtor për institucionet me mbi 60 nxënës, 21 orë normë për edukimin fizik

Ministria e Arsimit ka ndryshuar rregullat për numrin e nxënësve dhe ngarkesën mësimore në arsimin parauniversitar, duke vendosur pragun mbi 60 nxënës për emërimin e një drejtori shkolle dhe normën prej 21 orësh në javë për mësuesit e Edukimit fizik dhe sporteve.

Ndryshimet janë pjesë e udhëzimit nr. 16, datë 27 gusht 2026, i cili ndërhyn në udhëzimin e vitit 2023 për numrin e nxënësve për klasë dhe ngarkesën mësimore të punonjësve arsimorë.

Një nga ndryshimet përcakton se “kur numri i nxënësve është më shumë se 60, emërohet një drejtor shkolle”. Në disa dispozita të udhëzimit, pragu numerik ndryshon gjithashtu nga 81 në 61 nxënës.

Për shkollat me 61 deri në 200 nxënës, drejtori do të ketë një ngarkesë mësimore prej gjashtë orësh në javë, ndërsa për ato me 201 deri në 600 nxënës norma do të jetë katër orë në javë.

Udhëzimi përcakton në 21 orë në javë normën mësimore për mësuesin e lëndës Edukim fizik dhe sporte. I njëjti përcaktim shtohet në më shumë se një kapitull të aktit.

Ndryshime bëhen edhe në dispozitat për organizimin e klasave. Teksti i ri përcakton “tri klasa, kur numri i nxënësve është 21–30”, ndërsa shton kategorinë me katër klasa kur numri i nxënësve për klasë është 31–50.

Në ngarkesën mësimore përfshihen me rregulla të reja edhe funksione të tjera në shkollë. Kryetarit të ekipit lëndor i ulet norma mësimore me dy orë në javë.

Mësuesi koordinator i sigurimit të cilësisë do të ketë normë mësimore prej 6 deri në 10 orësh në javë, ndërsa mësuesi koordinator i këshillimit të karrierës nga 8 deri në 12 orë në javë.

Udhëzimi parashikon gjithashtu ulje të normës për drejtorin ose nëndrejtorin që organizon dhe monitoron programin “Pas shkolle”. Ulja është dy orë në javë kur institucioni ka deri në katër grupe ose klube dhe katër orë kur ka më shumë se katër.

Për drejtorët dhe nëndrejtorët me profil të arsimit fillor, udhëzimi lejon që ngarkesa javore të plotësohet edhe me orë mësimore të përcaktuara në kreun V të aktit. Në listën e kategorive përkatëse shtohen gjithashtu mësuesit e artit pamor dhe të edukimit muzikor.

Në arsimin me profil sportiv, për specialitetin “Futboll”, orët e Formimit Praktik Profesional do të ndahen në grupet “Lojtarët” dhe “Portierët”, ndërsa grupi i portierëve duhet të ketë jo më pak se gjashtë nxënës të të njëjtit nivel arsimor./Monitor/