Urgjencë kombëtare, Kurti: Peshorja e Justicias ka çaluar kah i fuqishmi dhe i pasuri!
Drejtësia në Kosovë vazhdon të jetë disi e shtrembër. Dhe nuk ka se si të jetë ndryshe kur Peshoren e Justicias, zonjës së drejtësisë, e kanë çaluar kah i fuqishmi dhe i pasuri, tha sot Kryeministri Albin Kurti gjatë mbledhjes së qeverisë ku kërkoi raport të detajuar për të gjitha lëshimet e mundshme institucionale që i paraprinë vrasjes së Arlinda Zekajt në Vitomiricë të Pejës.
Për Kryeministrin e e Kosovës, nuk ka më nevojë për asnjë provë që të konstatojë se është urgjencë kombëtare drejtimi i drejtësisë, pas një vrasje me të tilla paralajmërime që nuk merrnin përgjigje, në fakt nuk kishte se si të përfundonte ndryshe.
“Tash, kur po flasim, kanë mbetur edhe 34 orë për hartimin dhe dorëzimin e atij raporti të cilin sigurisht që do ta ndajmë me publikun. Nesër mbrëma, para orës 18:00, i pres raportet. Drejtësia nuk ka lindur vetvetiu. Ajo është shfaqur si domosdoshmëri kundër vënies ndaj padrejtësisë që ka lindur në botën e pabarazisë. Drejtësia është garancia që i forti nuk do ta cënojë të dobëtin vetëm pse ata janë të tillë. Por në Kosovën tonë, dhe ndoshta jo vetëm në Kosovë, drejtësia fatkeqësisht nuk është në mbrojtje të të dobëtit, përkundrazi, drejtësia shpesh ka dalë në krahun e të fortit.
Drejtësia në Kosovë vazhdon të jetë disi e shtrembër. Dhe nuk ka se si të jetë ndryshe kur Peshoren e Justicias, zonjës së drejtësisë, e kanë çaluar kah i fuqishmi dhe i pasuri, ia kanë zbuluar njërin sy për të parë se kah të peshojë drejtësia. E natyrisht, shpata mandej nuk ka për t’i rënë asnjëherë krimit e kriminelëve, por do të bie gjithnjë mbi të dobëtin, të varfërin dhe të pafuqishmin. Republika e Kosovës nuk ka më nevojë për asnjë provë që të konstatojë se është urgjencë kombëtare drejtimi i drejtësisë,” tha Albin Kurti duke bërë të ditur se ministrja e Drejtësisë, Donika Gërvalla Schwarz, ka thirrur një takim urgjent me përfaqësues të institucioneve të sigurisë dhe drejtësisë, në nivel qendror dhe lokal, për të shqyrtuar rrethanat e rastit.
Me këtë rast, Kryeministri Kurti ka ngritur shqetësime edhe për funksionimin e sistemit të drejtësisë në Kosovë, duke theksuar se drejtësia duhet të jetë garanci për mbrojtjen e qytetarëve, veçanërisht të atyre më të cenueshëm. Sipas tij, problemet në sistem kërkojnë ndërhyrje urgjente dhe përgjegjësi institucionale.
“Arlinda u vra para shtëpisë nga kunati. E mbrëmë, pak para mesnatës, është arrestuar edhe dorasi i cili ishte në arrati. Secila vrasje është vepër e rëndë, por ajo rëndohet edhe më shumë kur qartazi shihet se ka pasur një zinxhir sistemor lëshimesh nga institucionet të cilat janë përgjegjëse për sigurinë dhe drejtësinë,” tha Kryeministri i Kosovës, Albin Kurti, duke përfunduar:
“Një vrasje me të tilla paralajmërime që nuk merrnin përgjigje, në fakt nuk kishte se si të përfundonte ndryshe. Dhe kjo e bën edhe më të pafalshme situatën.”
Ndryshe, pas dy ditësh në kërkim, Policia e Kosovës ka arrestuar Albert Sylajn, të dyshuar për vrasjen e Arlinda Zekajt më 25 tetor në Vitomiricë të Pejës. I dyshuari u lokalizua dhe u arrestua mbrëmë në Deçan, rreth orës 23:40, pas një operacioni policor dhe bashkëpunimit me qytetarët.
