Uruguai mund rusët dhe siguron vendin e parë në Grupin A

Kombëtarja e Uruguait regjistroi fitoren e tretë rresht dhe përfundoi në krye të renditjes me 9 pikë të mbledhura në grupin A në Kampionatin Botëror – “Rusia 2018”.

Uruguai triumfoi me rezultatin 3:0 kundër Rusisë.

E veçanta është se Uruguai për tri ndeshje apo për gjithsej 270 minuta nuk ka pësuar gol, duke dëshmuar mbrojtjen më të fortë deri me tani në ngjarjen më të madhe botërore. Në minutën e 10-të, Luis Suarez nga gjuajtja e lirë rreth 17 metra me një goditje të fortë e plasoi topin në këndin e majtë e të poshtëm të portierit rus, Akinfeev dhe 1:0.

Goli i hershëm ishte tronditës për rusët dhe motivues për Uruguain. Nuk kaloi as 13 minuta (23’), goditja nga rreth 20 metra e Diego Laxalt devijohet nga Cheryshev, duke shënuar autogol, 2:0. Rusët pësuan edhe një goditje të rëndë dhe kjo faktikisht ua preu edhe këmbët, duke mos pasur mundësi të bëjnë asgjë më shumë ndaj Uruguait që luajti me shumë mençuri, me një mbrojtje të fortë, mesfushë të përsosur dhe sulm të frikshëm.

Në minutën e 36-të, Rusia mbetet me një lojtar me pak, pasi që Igor Smolnikov u përjashtua nga loja pas dy kartonëve të verdhë. Kjo epërsi numerike Uruguait i dha edhe më shumë forcë dhe të administroi lojën pa problem. Në pjesën e dytë, kombëtarja nga Amerika Jugut pati edhe disa mundësi të mira, por rusët ishin me fat të madh. Në fund të ndeshjes, Edinson Cavani nga afërsia nuk fali, thelloi fitoren në 3:0.

Në takimin tjetër të grupit A, që u luajt për prestigj mes Arabisë Saudite dhe Egjiptit, përfundoi me fitoren e arabëve me 2:1. ë minutën e 22-të, sulmuesi këmbëshpejt Mohamed Salah kaloi në epërsi Egjiptin. Ai doli i vetmuar dhe nga rreth 16 metra parabolloi portierin arab, 0:1. Megjithatë, arabët nuk u dorëzuan dhe sulmuan. Në minutën e 41-të, Arabia pati rastin ideal që të barazoj rezultatin. Futbollisti Fahad Mosaed Al Muwallad dështoi nga penalltia, pasi gjuajtjen e tij e pret portieri El-Hadary dhe përfundoi me pas në shtyllë pingule. Në minutën e 45+5’, Salman Al Faraj barazoi rezultatin po nga penalltia, duke e mposhtur portierin El-Hadary. Në minutën e 90+5, Salem Al Dawsari nga afërsia siguroi fitoren e Arabisë me rezultat 2:1.

Egjipti përfundoi në vend të fundit me 0 pikë, kurse Arabia në vend të tretë me 3 pikë.

Uruguai-Rusia 3:0

Stadiumi “Cosmos Arena”, Samara.

Shikues: 41.000.

Gjyqtar: M. Diedhiou (Senegali).

Shënues: Suarez (10’), Cheryshev (23’), Cavani 90’).

Kartonat e verdhë: Bentacur – Gazinskiy, Smolnikov.

Karton i kuq: Smolnikov (pas dy të verdhëve).

Uruguai: Muslera, Coates, Godin, Caceres, Laxalt, Nandez (Rodriguez (73’), Torreira, Bentacur (De Arrascaeta 63’), Vecino, Suarez, Cavani (Gomez 90+3’).

Rusia: Akinfeev, Smolnikov, Kutepov, Ignashevich, Kudryashov, Gazinskiy (Kuzyayev 46’), Zobnin, Samedov, Miranchuk (Smolov 60’), Cheryshev (Fernandes 38’), Dzyuba.

Arabia Saudite – Egjipti 2:1

Stadiumi në Volgograd.

Shikues: 36.823.

Gjyqtar: W. Roldan (Kolumbia).

Shënues: Salman Al Faraj (45+5’ nga penalltia), Al Dawsari (90+5’)– Salah (22’) .

Kartonat e verdhë: Gabr, Fathy.

Arabia Saudite: Almosailem, Osama, Alburayk, Salman, Hatan (Asiri 65’), Yasser, Otayf, Hussain, Salem, Al Muwallad (Al – Shehri 79’), Motaz.

Egjipti: El-Hadary, Fathy, Gabr, Hegazy, Abdelshafy, Elneny, Hamed, Salah, Elsaid (Warda 45+6’), Treziguet (Kahraba 81’), Mohsen (Sobhy 64’).

Grupi A

Uruguai-Rusia 3:0

Arabia S.- Egjipti 2:1

Tabela

1. Uruguai 3 3 0 0 9

2. Rusia 3 2 0 1 6

3. Arabia Saudite 3 1 0 2 3

4. Egjipti 3 0 0 3 0