US Open/ Rafael Nadal fiton titullin e 19-të Grand Slam
Tenisti spanjoll, Rafael Nadal ka fituar trofeun e 19-të në kuadër të turneve Grand Slam në garën kundër rusit, Daniil Medvedev, në një nga finalet më të mira të zhvilluara në US Open.
Nadal, 33-vjeçar ka fituar 7-5, 6-3, 5-7, 4-6, 6-4 në sete, në fushën e tenisit në New York, raporton RFE.
E gjithë loja ka zgjatur katër orë e 50 minuta, apo vetëm katër minuta më pak se finalja më e gjatë e zhvilluar ndonjëherë në US Open.
Kjo fitore, e dërgon emrin e Nadalit afër kundërshtarit të tij zviceran, Roger Federer, i cili kryeson në listën e Grand Slamëve të fituar.
“Kjo ka qenë një nga netët më emocionuese në karrierën time të tenisit. Ka qenë një finale e mrekullueshme. Ka qenë një lojë e çmendur,” tha Nadal.
Medvedev, 23-vjeçar ka përshëndetur kundërshtarin e tij.
“Unë vetëm dua të përgëzoj Rafan, titulli i 19-të Grand Slam është diçka e pabesueshme,” tha Medvedev, teksa është parë i mahnitur me fitoret e Nadalit, në një video ku janë shfaqur momentet e tij më të mira përgjatë viteve në fushë.
