Vatikani akuzon dhjetë persona për krime financiare

Gjykata Penale në Vatikan ka caktuar 27 Korrikun si ditën kur para gjyqit do të dalin dhjetë persona duke përfshirë dhe një kardinal, të akuzuar për krime financiare, si përvetësim, pastrim parave, mashtrim dhe keqpërdorim të postit zyrtar.

Në mesin e të akuzuarëve është dhe kardinali Angelo Becciu, ish-shefi i bashkësisë informative financiare të Vatikanit dhe dy ndërmjetës që kanë marrë pjesë në blerjen e një godine në pjesën elitare të Londrës.

Becciu, të cilin Papa Françesku e ka shkarkuar vitin e kaluar, gjatë hetimeve dyvjeçare theksonte se është i pafajshëm. Tashmë është zyrtari më i lartë kishtar i Vatikanit i cili është akuzuar për krime ekonomike.

Ndërkohë edhe ndërmjetësit italian të pasurive të patundshme që janë akuzuar, mohojnë akuzat.

Sipas ligjit kishtar, Papa ka miratuar personalisht vendimin e gjyqtarit për të hetuar dhe akuzuar Becciun. Akuzat kundër tij përfshijnë përvetësimin dhe keqpërdorimin e postit zyrtar. Edhe shtetasja italiane që punoi për Becciun është akuzuar për përvetësim.

Ndërmjetësit italian Gianluigi Torzi dhe Raffaele Mincione janë akuzuar për përvetësim, mashtrim dhe pastrim të parave. Torzi, për të cilin është lëshuar fletë arresti që në muajin prill, është akuzuar edhe për zhvatje. Të dy mohojnë akuzat!

Nga Gjykata Penale në Vatikan janë akuzuar edhe katër kompani të lidhura me disa prej akuzave, dy nga Zvicra, një nga SHBA dhe një nga Slovenija.