Vendimi, Komiteti i Ekspertëve: Masat kanë dhënë efekt, mbeten në fuqi!
Masat për parandalimin e përhapjes së koronavirusit që u propozuan para dy javësh kanë dhënë rezultate dhe ndonëse situata vijon të jetë delikate ajo është e qëndrueshme, tha kryetarja e Komitetit Teknik të Ekspertëve, Mira Rakacolli, duke bërë të ditur se këto masa mbeten në fuqi.
“Masat të cilat u propozuan para dy javësh kanë filluar ta japin efektin e tyre, ndaj mbetemi aty, duke i vlerësuar më ngushtësisht në kohëra më të ngushta efikasitetin e kësaj tendence ulje. Pra po e përsëris masat që vazhdojnë të ngelen në fuqi, janë ato të kufizimit të lëvizjes së qytetarëve, duke nisur nga ora 20:00 deri në 06:00.
Shkollat e mesme në ato vende të cilat u përcaktuan në 2 javëshin më përpara do të vijojë online. Dhe universitetet do të vijojnë online, përveç provimeve të kombinuara. Fluturimet me Britaninë e Madhe vijojnë të mbeten të pezulluara. Thirrje qytetarëve, situata është delikate, duke qenë optimistë për këtë tendencë të lehtë uljeje të vazhdojmë të respektojmë masat dhe rregullat e higjienës,” tha Dr.Rakacolli duke bërë thirrje për respektimin e masave Anticovid me theks të veçant tek të rinjtë.
“Komuniteti i të rinjve po preket në forma të rënda. Në repartet e kujdesit intensiv kemi të shtruar persona në moshë të re.”
Ndërsa Drejtorja e ISHP, Albana Fico, duke bërë të ditur se 79% e rasteve në dy javët e fundit janë të moshave nga 24-54 vjeç ajo sot bënë apel për kujdes të shtuar.
“Mesatarja ditore e javës së 7-të e rasteve të konfirmuara ka pësuar një rënie. Pozitiviteti i mostrës mbetet i qëndrueshëm. Ajo çka është në totalin e personave të cilëve testohen, sa prej tyre konfirmohen ose janë pozitivë. Incidenca dy javore dhe pse mbetemi në një transmetim komunitar të gjerë ka një tendencë ulje. Mbetet konstante tek 1.7. Ajo që dua të sjell në vëmendje ka qenë që moshat kanë ndryshime dinamike. Moshat 24-35, 45-54 kanë një shtim të numrit të rasteve. Nëse do duam ta vlerësojmë ndryshimin dinamik të përfshirjes së mostrave nga dy javëshi pararendësi, moshat nga 24-35, 45-54 janë 79% e rasteve pozitive. Prekja e këtyre moshave ka ndryshuar dhe mund të ndryshojë vetëm nëse ne do të jemi shumë të kujdesshëm jo vetëm me implementimin e masave të thjeshta, për rregullat e vendosura, por mendoj që kjo është dhe një apel për të qenë të qartë që nuk e kemi përfunduar këtë betejë. Përpos këtyre shifrave që në një kuptim na bëjnë ne të vijojmë të mbetemi të kujdesshëm, fillimi i vaksinimit, është si për të gjithë botën, fillimi i atij rrugëtimi për të parë dritën në fund të tunelit, tha Dr.Albana Fico duke përfunduar:
“Por kjo nuk mund të na vetëkënaq por duhet të vijojmë me zbatimin e të gjithë masave. Dua të apeloj tek qytetarët që nëse keni shenja të COVID-19 drejtohuni mjekut të familjes, nëse rasti është i rëndë drejtohuni tek 127.”
Ndërkohë drejtori i Urgjencës Kombëtare, Skënder Brataj, për dallim nga dje ku propozonte mbylljen që nga ora 18:00 sot tha se ka një ulje të lehtë:
“Fakti pozitiv është kontrolli i indikatorëve të infeksionit, ku tregohet se ka një ulje të lehtë. Nga 2500 thirrje që kemi pasur në 24 orë kemi shkuar në 2300. Më rëndësishme është numri i shtrimeve në spital, nga 44 që ishte në janar, duke u rritur deri në 100 shtrime, duke arritur maksimumin më datën 15 shkurt 140. Ka zbritur poshtë numrit 100 dhe shpreh një optimizëm që masat kanë dhënë një efekt,” tha Dr.Brataj duke përfunduar:
“Kështu që situata është nën kontroll, monitorimi vijon i përditshëm, ne kemi numrat e saktë sa i përket shtrimeve të spitaleve që janë 648. Hapja e spitaleve rajonale ndihmoi në përmirësimin e situatës. Situata vijon të jetë në kritike në Tiranë dhe vijon në qarqet e tjera.”
